Kwibuka 22: Abanyarwanda baba Abidjan bibutse abazize Jenoside yakorewe Abatutsi

Kuri uyu wa gatandatu tariki ya 09 Mata 2016, Abanyarwanda bagize Diaspora yo muri Côte d’Ivoire bafatanije n’inshuti zabo bahuriye mu muhango wo Kwibuka ku nshuro ya 22 Jenoside yakorewe abatutsi mu 1994.

Uyu muhango wabereye Abidjan mu cyumba mberabyombi cya Latrille Event, ukaba witabiriwe n’abantu b’ingeri nyinshi, harimo Abanyarwanda bakorera umuryango w’abibumbye, abakorera Banki Nyafurika Itsura Amajyambere, abakorera imiryango mpuzamahanga inyuranye, abikorera ku giti cyabo, abihaye Imana, abanyeshuri, ndetse  n’abanyamahanga b’inshuti za Diaspora.

Uyu muhango kandi witabiriwe n’intumwa yungirije y’umunyamabanga mukuru wa UN, Simon Munzu wanatanze ikiganiro cyerekana aho Abanyarwanda bageze biyubaka, n’uruhare tugira mu bikorwa byo kubungabunga amahoro hirya no hino.

Umuyobozi wa Diaspora Nyarwanda ya Côte d’Ivoire BOEDTS UWIMANA Joséphine, mu ijambo rye yabwiye abitabiriye uyu muhango ko Abanyarwanda bafite inshingano zo kwibuka ababo babuze.

Ati “Tugomba kububahiriza twamaganira kure abapfobya Jenoside yakorewe abatutsi.”

UWIMANA yibutsa ko u Rwanda rwavuye kure, none rukaba rugeze heza ko tugomba kwirinda muri rusange icyahungabanya u Rwanda n’Abanyarwanda.

Komiseri mukuru w’Abapolisi ba UNOCI, CP Vianney NSHIMIYIMANA yashimiye abitabiriye uyu muhango atanga n’impanuro zijyanye no kurwanya ingengabitekerezo ya Jenoside, anasobanura uburyo Jenoside itegurwa n’uko ishyirwa mu bikorwa.

NSHIMIYIMANA yanibukije abari bitabiriye umuhango ko ubu ikiciro kigezweho ari uguhakana no guphobya Jenoside yakorewe Abatusti, bityo abari aho bose bakwiye guhangana n’abo bayihakana n’abayiphobya.

Umuhango watangiye i saa yine za mugitondo, kugera i saa sita n’igice. Mu bindi bikorwa byakoze habayeho amasengesho, umunota wo kwibuka, gucana urumuri rw’icyizere , havugwa imivugo, herekanwa film, ndetse n’ibiganiro.

UM– USEKE.RW