Kwibohora bivuze kwikiza abayobozi babi n’ubuyobozi bubi- P. Kagame

*Kagame yishimiye ko abatuye aka gace biyambuye agahinda bagaragazaga hambere,
*Yabizeje kuzagaruka, ngo yizeye ko ibyishimo bizaba byariyongereye,…

Nyabihu- Mu muhango wo kwizihiza isabukuru y’imyaka 23 ishize u Rwanda rwibohoye wabereye mu murenge wa Shyira, Perezida wa Repubulika y’u Rwanda, Paul Kagame yagarutse ku nzira yo kwibohora, avuga ko urugamba rutangirira mu kuburizamo imigambi mibi y’abayobozi babi n’ubutegetsi bwabo, hagakurikiraho guhangana n’ingaruka zatejwe n’iyi miyobore mibi.

Umukuru w’igihugu wagarutse ku miyobore mibi yaranze u Rwanda mbere y’uko habaho urugamba rwo kubohora igihugu, yavuze ko ubutegetsi bubi bwatumye Abanyarwanda bibasirwa n’ibibazo.

Yagarukaga ku buhamya bwari bwatanzwe n’abaturage bariho mbere y’urugamba rwo kwibohobora. Ati “Ubutegetsi bubi burangwa n’ubukene, inzara, uburwayi, gusonza…”

Perezida Kagame avuga ko iyo hariho ubutegetsi bubi nta munyagihugu ubaho neza kuko nw’uwitwa ko abayeho neza hari aho aba babikura kandi hataramba.

Ati “…N’ugira amikora agahora ateze amaboko ku bandi, baba batabonetse bigenda gute [abaza abitabiriye iki gikorwa]  iyo bitabonetse witaba Imana.”

Umukuru w’igihugu avuga ko kwibohora bikorwa mu nzego ebyiri zirimo kuburizamo imigambi y’abategetsi babi barangaje imbere ubu butegetsi bukandamiza abanyagihugu.

Ati “Kwibohora bivuze kwikiza abayobozi babi n’ubuyobozi bubi, ni ukwikiza ibyo bateye, izo nzara, uburwayi, umwiryane, imfu ziza zigahitana abana bakiri bato n’abakuru.”

Avuga ko urugamba rwo gukuraho ubutegetsi bubi n’ibyaburanze rwarangiye. Ati “Ibyo kwikiza ubuyobozi bubi n’abayobozi babi byarabaye.”

Perezida Kagame uvuga ko iyo urugamba rw’amasasu rurangiye hakurikiraho urwo kubaka ibyasenywe n’imiyoborere mibi no kuziba icyuho basize, avuga ko mu myaka 23 ishize hari byinshi byakozwe muri uru rugamba.

Ati “Ibyasigaye muri iyi myaka 23 na byo byagiye bikemuka, iby’abayobozi bari basigaye n’ibyagiye bikomoka kuri ibyo bya mbere byagiye bikemuka…

Ariko ibigira ingaruka kuri twese by’inzara,ubukene n’ibindi bibi byose turacyahangana na byo hari aho tubigejeje ariko haracyari urugendro rurerure rusigaye, turi mu gice cya Kabiri cyo kwivanaho biriya bibi byose byatewe n’ubuyobozi bubi n’abayobozi babi.”

Perezida Kagame wabanje gutaha ibitaro bya Shyira byuzuye bitwaye miliyaridi 4.5 Frw n’imidugudu ibiri yubakiwe abahuye n’ibiza, yavuze ko ibikorwa nk’ibi bigaragaza ibishobora kugerwaho.

Avuga ko ibi bikorwa biri henshi mu gihugu. Ati ”Ibintu byarahindutse, abana bariga, urwaye abona aho yivuza, abaturage mu Rwanda hose bashobora guhinga, bakorora, bakigaburira bakagira n’ibyo bajyana ku masoko, n’amafaranga bazakoresha ibindi bifuza.”

Yagarutse kandi ku buhamya bwatanzwe n’abavuga ko ubuzima bwahindutse kubera imiyoborere myiza ishyira imbere abanyagihugu.

Ati “Ku ruhande rumwe icyo ni igipimo kitubwira aho tugeze mu ntambwe ya kabiri kandi turifuza ko bigera kuri buri wese.”

Yishimiye ko abatuye aka gace bagaragaza akanyamuneza…

Perezida Kagame wabanje gutaha ku mugaragaro ibitaro bya Shyira byuzuye bitwaye miliyaridi 4.5 Frw n’imidugudu ibiri yubakiwe abagizweho ingaruka n’ibiza, yagarutse ku byatangajwe n’umwe mu buhawe inzu wavuze ko yageraga mu nzu y’ibati ari uko yagiye kwa muganga. Ati “yari akwiye kuba afite inzu imeze ityo”

Aba baturage kandi batangaza ko batangajwe n’ibi bagejejweho n’imiyoborere myiza, bavuga ko byabatonze kuba mu nzu irimo amashanyarazi.

Kagame avuga ko ntawe ukwiye gutungurwa n’iyi mibereho myiza kuko ubundi ari byo biba bimukwiye. Ati “Aho twagiye ngo aho kwatsa cyangwa kuzimya urumuri ntibahabonaga ngo babanje kuyazimya bahuha nk’uzimya agatadowa.[Ubwo urumva rero aho tuva].”

Yasabye aba baturage bagejejweho ibi bikorwa kudahanga amaso inkunga ahubwo bagaharanira ko uyu musingi bahawe ubafasha gutera intambwe.

Umukuru w’igihugu yavuze ko yishimiye kubona abaturage baje kumwakira bishimye, avuga ko mu minsi yatambutse bagaragazaga ko batishimye.

Ati “Byarahindutse pe. Ntabwo ari uguhinduka gusa ku mubiri nta n’uwasekaga, wabonaga buri wese arakaye cyangwa se yihebye ni byo nasanze hano kandi ntabwo ari imyaka myinshi ishize, ubona abantu uko bameze bakagaraga nk’abatizeye ko buri buke.”

Umukuru w’igihugu wamaze gutangazwa by’agateganyo nk’umwe mu bakandida bazahatana mu matora y’umukuru w’igihugu yizeje aba baturage kuzagaruka muri aka gace, ababwira ko azaba agaruwe n’ibikorwa bifitanye isano n’uyu munsi wo kwibohora.

Yabasabye gushyira imbaraga mu bikorwa bibeteza imbere, abasaba ko yazasanga bishimye kurusha uko bari bameze uyu munsi.

Perezida Kagame ukunze gushishikariza urubyiruko kugira uruhare mu miyoborere y’igihugu, yavuze ko avutse ubwo u Rwanda rwibohoraga ubu bafite imyaka 23, akavuga ko n’abandi bari bakiri bato ubu bafite imyaka y’ubukure kandi ko ari bo bagize umubare munini w’abanyagihugu.

Yabasabye kwigira ku mateka ababyeyi babo baciyemo bagaranira kuyakosoza ibyiza. Ati “Ni mwe bayobozi b’iki gihugu imyaka myinshi iri imbere, mufite byinshi musabwa mu buryo bw’uburere, mu buryo mugenda mwubaka ubuzima bwanyu.”

Avuga ko imiyoborere y’u Rwanda rwa none iha amahirwe buri wese bityo ko ntawe ukwiye gucibwa intege n’imyaka ye. Ati “Uw’imyaka 23 ntagombe gutegereza indi 23, bikaba mbere, arabyifuza mu gihe gito guhera ubu kandi birashoboka.”

Photos/Plaisir Muzogeye

UM– USEKE.RW