Karongi: Nyamugwagwa aho abana bigiraga mu kagari no mu rusengero batashye amashuri mashya

Ange Eric Hatangimana
10/07/2016

Nubwo iri shuri ryabonye bimwe mu byumba bishya haracyari n’ibindi bishaje cyane

Ku ishuri ribanza rya Nyamugwaagwa mu kagari ka Nyamugwaagwa Umurenge wa Ruganda mu karere ka Karongi, muri iki cyumweru hatashywe ibyumba bitandatu by’amashuri mashya yubatswe ku bufatanye bw’akarere n’ingabo z’u Rwanda zavuye ku rugerero (RDF/Reserve Force). Aha abanyeshuri 116 bigiraga mu rusengero rwa EPR naho 74 bakigira mu biro by’akagali, ubuyobozi bw’ikigo burashima iki gikorwa gusa ngo bakeneye n’intebe n’ibiro by’abarimu.

Kuri iri shuri hakubiswe n’inkuba muri Nzeri 2015, ihitana abana batanu hanangirika ibyumba by’amashuri.

Iri shuri ryigwaho n’abanyeshuri 577.

Umuseke wasuye iri shuri, usanga abana bigira mu rusengero abandi bigira mu biro by’akagari, ariko ubu bubakiwe ibyumba bishya batashye ku wa kabiri w’iki cyumweru.

Aya mashuri yuzuye atwaye amafaranga y’u Rwanda miliyoni 63 ku bufatanye bw’Akarere ka Karongi n’Ingabo z’u Rwanda zavuye ku rugerero (RDF/Reserve Force), umurenge wa Ruganda, n’akagari ka Nyamugwaagwa.

Nteziryimana Samuel Umuyobozi w’iri shuri ribanza rya Nyamugwaagwa, yatangarije Umuseke ko kiriya gikorwa bakishimiye cyane.

Ati “Twashimiye ubuyobozi kuko twigiraga ahantu hatameze neza kubera ibibazo twagiye tugira. Twashimiye ubuyobozi bw’umurenge, mbese ubushobozi bwose mpereye ku bwo hasi, nkurukije uko inzego zigenda zikurikirana.”

Nteziryimana avuga ko abaturage bose babonye akazi mu mirimo yo kubaka ayo mashuri bahembwe neza, ngo abasigaye bazahembwa ku wa mbere, kandi ngo nabwo amafaranga asigaye, atagera ku bihumbi 50.

Avuga ko hakiri andi mashuri ashaje, na yo bikaba byumvikana ko ari ikibazo, ariko ngo ikindi kibazo gikomeye ni uko nta na salle y’abarimu ishuri rifite.

Ati “Twizera ko ubuyobozi bwagiye budufasha, bizakorwa bigakunda. Inama y’abarimu hari salle ishaje tuyikoreramo mu gihe tugitegereje.”

Iri shuri rya Nyamugwaagwa ngo rikeneye n’intebe kubera ko babaze izigera kuri 70 zibura, ku buryo ngo hagize ubakubitiramo agasuka (inkunga), izindi zasigara bazazishakamo.

Baragenzura ngo barebe niba nta ho rwiyemezamirimo yasondetse — Baragenzura ngo barebe niba ntaho abubatsi basondetse

Abanyeshuri baruhutse kwigira mu biro by'akari no mu rusengero — Abanyeshuri baruhutse kwigira mu biro by’akagari no mu rusengero

Imirimo yo kubaka iri shuri ngo yafashije abaturage bahakoze kwikenura kandi hafi ya bose barahembwe — Imirimo yo kubaka iri shuri ngo yafashije abaturage bahakoze kwikenura kandi barahembwe neza

Abayobozi b'ishuri n'ingabo zagize uruhare mu kubaka amashuri — Abayobozi b’ishuri n’ingabo zagize uruhare mu kubaka amashuri

Aha Umuseke wahageze abana barimo bigira mu rusengero — Muri uyu mwaka Umuseke wahageze abana bari bigira mu rusengero

Kuri iki kigo ngo bakeneye ibiro na salle y'abarimu kuko bakorera mu nzu ishaje cyane — Aba bana icyo gihe bigiraga ahadakwiye ubu bagiye kwigira mu byumba byiza

UM– USEKE.RW

6 Comments

Madudu says:
10/07/2016 at 11:01

Yoooo! Imana ishimwe, biranejeje pe! Abana b’i Nyamugwaagwa ni abana nk’abandi erega!

mateka says:
10/07/2016 at 18:05

Biragaragara ko iterambere kubanyarwanda ryari ryaraheze mu mugi i Kigali iyi myaka yose.Abatazi amateka rero iyo uniform kaki n’ubururu twayambaye bwa mbere muri 1979 buri mwana wese mu Rwanda yahawe ayo mayadi ku buntu ababyeyi bakayidodesha.Icyo gihe Ministre w’uburezi n’amashuli abanza yitwaga Mutemberezi petero karaveli.

Innocent Ntaganzwa says:
10/08/2016 at 06:10

Mukosore ahanditse ngo rwiyemezamirimo ntabwo RDF Reserve/Force ntabwo Turi ba rwiyemeza mirino ni ubufatanye bw’ingabo n’akarere
Naho rwiyemeza mirimo arapiganwa twe siko bimeze rero kuko dutabara aho bikomeye tugafasha abayobozi kwihutisha ibyo bahize mumihigo kugirango bahigure ibyo bemerereye abaturage
- Buyuki says:
  10/09/2016 at 13:55
  
  Ubwose ushatse kuvugiki? samafarangase yabana bu Rwanda harahandi bayavana?