Ikipe y’igihugu ya Maroc yasuye urwibutso rwa Gisozi mbere yo gutaha

*Maroc yatsinze Amavubi y’u Rwanda 4-1 mu mukino usoza imikino y’itsinda A, ariko ntibyayibuza gusezererwa

*Abakinnyi, abatoza, n’abari babayoboye ngo bakuye ku rwibutsoisomo rikomeye.

Ku gicamunsi cyo kuri uyu wa mbere, Ikipe y’igihugu y’umupira w’amaguru ya Maroc yasuye urwibutso rw’abazize Jenoside yakorewe abatutsi mu 1994 rwa Gisozi mbere y’uko isubira iwabo kuko yasezerewe mu marushanwa ya CHAN yari irimo mu Rwanda.

M. Fouad Ouarzazi wari uyoboye itsinda ry’abakinnyi, abatoza n’abayobozi bazanye n’ikipe y’igihugu ya Maroc mu mikino ya CHAN yatangaje ko ibyo babonye ku rwibutso kuri Jenoside rwa Kigali bakuyemo isomo ku buryo bazabibwira n’abandi.

Mu kiganiro n’abanyamakuru, Fouad Ouarzazi yavuze ko bifatanyije mu kababaro n’Abanyarwanda nyuma yo kureba amarorerwa yabereye mu Rwanda.

Yagize ati “Birababaje cyane kubona umuntu atema undi, akamwica ngo kuko badahuje ubwoko. Gusa Jenoside nk’iyabereye mu Rwanda ntizongere ukundi. Aya mashusho twabonye mu rwibutso azaguma mu bitekerezo byacu.”

Fouad yashimiye ubuyobozi bw’u Rwanda kuba bwabashoboje kuza gusura urwibutso rwa Jenoside yakorewe Abatutsi, kuko ngo isomo bakuyemo ari isomo ry’amahoro, dore ko ngo no mu bisanzwe umupira w’amaguru ari umuyoboro mwiza ugeza abantu ku bumwe.

Ikipe ya Maroc kandi yashimiye ubuyobozi b’u Rwanda, ndetse n’Abanyarwanda ku mutima mwiza baberetse, dore ko yemeza ko yakiriwe neza mu Rwanda.

Ngo basanze u Rwanda ari igihugu kigendera kuri gahunda muri byose kandi gifite amahoro n’umutekano bisesuye, bityo ngo bashyiriye Abanya-Maroc benewabo ubutumwa bw’uko u Rwanda ari igihgu cyiza, gisa neza, gifite abaturage basirimutse.

Aba banya-Maroc basabye Abanyaranda gukomeza kubana mu mahoro n’ubumwe kuko bose ari ibiremwa muntu, nubwo habaho itandukaniro ku madini, uruhu cyangwa ikindi cyose abantu badahuriraho.

Daddy SADIKI RUBANGURA
UM– USEKE.RW