Icyegeranyo: Abanyarwanda 48 mu 100 ntibazi akamaro k’Inteko

Mu cyumweru gishize umuyobozi w’umutwe wa Sena mu Rwanda Dr Jean Damascène Ntawukuriryayo yavuze ko abanyarwanda bataramenya akamaro k’Inteko ishinga amategeko. Kuva kuwa kane w’icyumweru gishize Umuseke wabajije ikibazo kimwe abanyarwanda 100 b’ingeri zitandukanye b’ahantu hatandukanye; “Uzi akamaro k’Inteko Ishinga Amategeko?”. Abantu 48 ntabwo bazi akamaro kayo, 31 bavuga akamaro kayo bazi, 21 ntacyo bashatse kuvuga.

Muri Nzeri 2013 abanyarwanda miliyoni esheshatu (6) batoye Abadepite. Muri iki cyegeranyo, mu bantu 100 babajijwe n’Umuseke 48 ntabwo bazi akamaro k’abo batoye. Ibi ni bimwe mu bisubizo bahaye Umuseke;

Aba bantu 54 babarijwe mu aho bakorera no mu mihanda, 46 babarizwa ku mbuga nkoranyambaga.

31 bavuze akamaro bazi k’Inteko. Ibi ni BIMWE mu bisubizo byabo:

–          Inteko mbona ikora neza ibyo ishinzwe byo kuvugurura no gutora amategeko

–          Inteko nziko ari intumwa zacu rubanda

–          Batumiza abayobozi bagasobanura ibitagenda neza

–          Batumiza Ministre w’Intebe bamakamubaza ibya Guverinoma ye

–          Ni urwego ruvugira rubanda rurimo abasenateri n’abadepite batora amategeko

–          Baratuvugira

–          Nziko batora amategeko atugenga

–          Amategeko tugenderaho nibo bayatora, amwe ndayazi ariko ibintu nk’ibyo simbimenyereye umbabarire.

–          Bambwiye ko aribo bashyiraho amategeko

–          Nitwe twabatoye tubohereza kutuvugira aho hejuru

–          Nibo batwigira uko abaturage tugomba kubaho natwe tugakurikira

–          Ni abadepite, n’abasenateri b’abasaza badatinya bagomba kutuvugira

–          Bagomba gutumira abayobozi bakoze amakosa kuko twe ntitwabashobora

–          Abasenateri ni abasaza bubashywe bemeza amategeko tugenderaho Perezida akayasinya

–          Inteko itariho twaba nko mu ishyamba buri wese akitegeka.

48 ntabwo bazi akamaro k’Inteko. BIMWE mu bisubizo byabo

– Nta kamaro kabo nzi ntibagera iwacu. Nawe umbaza wasanga utarabona umudepite

– Ubwose namenya ngusubiza iki wangu? Inteko sinyizi kabisa

– Ntakamaro kabo nzi, sinjya nkunda kubyinjiramo simbikoramo

– Mbona biyamamaza

– Njye sindabona umudepite, ubwo akamaro kabo nakubwira ni akahe?

– Mbona bagenda mu bimodoka byiza gusa tu

– Mu Rwanda hari Inteko nyinshi, afazali (Tafadhali) wambaza iy’Abunzi niyo nzi. Bariya sinzi akamaro kabo

– Ndi umunyeshuri simbizi, no mu ishuri ntitujya tubyiga

– Twe abacuruzi ntitujya tubimenya

– Nyumva gutyo pe

– Nkamwe abanyamakuru mugomba kubitangaza abaturage tukabimenya, ndayizi ariko sinzi akamaro kayo.

– Inteko ishinga amategeko nyizi ko ari inteko ariko ntamakuru yandi nyifiteho

– Twumva ngo bagiye mu baturage ariko ntibakunze kuhagera

– Ntanubwo nyizi njye

– Sinzi akamaro kayo reka nikomereze akazi

– Nziko ari abadepite nta kindi

– Maze n’aho bakorera ntaho nzi

– Numva ngo bagiye mu muganda ibunaka, ubwo niko kamaro kabo nzi

– Numva ngo ni intumwa zacu ariko sinzi ibyo badutumikira.

Abantu 21 bo ntacyo bifuje kuvuga ku kamaro k’Inteko

Ibisubizo byabo birabangutse bimwe biranakarishye

–          Ntacyo nayivugaho sha

–          Nzi akamaro kayo ariko ntacyo nakubwira ubu

–          Ndeka nikorere akazi wana

–          Uzansange aho nkorera nkubwire

–          Akamaro k’Inteko??? Oya genda ntacyo nayivugaho.

Icyegeranyo cyakozwe na Eric Birori na Umuseke

UM– USEKE.RW