Gitwe: Abadepite basabye abaturage gutora Itegeko Nshinga rishya 100%

Muri gahunda y’imitwe yombi igize Inteko Ishinga Amategeko y’u Rwanda, Kuri uyu wa 15 Ukuboza 2015, abaturage bo mu Karere ka Ruhango, Umurenge wa Bweramana basobanuriwe ibyahindutse mu Itegeko Nshinga rishya rya Repubulika y’u Rwanda, maze basabwa kuzariha umugisha baritora 100%.

Kuri uyu wa kabiri Hon. Manirarora Anoncée na Hon. Mporanyi Theobald baherekejwe n’Ubuyobozi bw’Akarere ka Ruhango bagiranye ikiganiro n’abaturage babasobanurira byimbitse ingingo zahindutse mu Itegeko Nshinga rya Repubulika y’u Rwanda ryo mu 2003.

Izi ntumwa za Rubanda ubwo zatangiraga ibiganiro zibukije ko impamvu nyamukuru yatumye Itegeko Nshinga rya Repubulika y’u Rwanda rihinduka byaturutse ku busabe bw’Abanyarwanda basaga Miliyoni enye bandikiye Inteko Ishinga Amategeko basaba ko zimwe mu ngingo zaryo zihinduka.

Nk’uko byagaragajwe na Hon. Manirarora Anoncée wagaragaje ko benshi mu Banyarwanda basabye ko Itegeko Nshinga ryahinduka, bagushije ku ngingo yaryo y’101, ingingo ivuga ibirebana na Manda za Perezida wa Repubulika; Aha benshi bakaba baragaragazaga ko iriya ngingo ishobora kuzabera imbogamizi Perezida Paul Kagame bifuza ko azakomeza kubayobora.

Depite Manirarora Anoncée, amaze gusobanura neza uburyo Inteko yasuzumye ubusabe bw’Abanyarwanda yahise abamenyesha ko nk’uko babyumvise kuwa 18 Ukuboza 2015, hari amatora ya referandumu.

Ati ”Iyi referandumu nimwe mukwiye kuyiha umugisha, maze kuri uyu wa gatanu mukazatora Yego.”

Mu gushimangira ibyo mugenzi we yavuze, Hon. Depite Mporanyi Theobald yasabye abaturage kuzazinduka bambaye neza maze bakarushaho kwihesha agaciro batora Yego, dore ko ngo iri Tegeko Nshinga ari iry’Abanyarwanda, ryashyizweho nabo, kandi rikagenga ubuzima bwabo mu gihugu cyababyaye.

Mporanyi Theobald ati “Ishema dufite n’uko kenshi abanyamahanga bayoberwa ibanga Abanyarwanda tugendana, kuko usanga kenshi mu manama mpuzamahanga batubaza imikorere yacu bakayoberwa, muze twongere kwihesha agaciro dutora Yego.”

Abaturage batandukanye batanze ibitekerezo bakaba bagushaga ku kuzatora 100%, dore ko basanga kuba Itegeko Nshinga ryabo rigiye guhindurwa ari igikorwa cyiza kuko bitazabangamira Perezida Paul Kagame bifuza ko akomeza kubayobora nyuma ya 2017.

Photos/Damyxon
Jean Damascene NTIHINYUZWA
UM– USEKE.RW-Ruhango