Gisagara: MINISPOC yageneye abacitse ku icumu Frw 7 000 000 n’amabati

Minisiteri y’Umuco na Siporo (MINISPOC) ifatanyije n’ibigo biyishamikiyeho kuri uyu wa gatanu tariki 12 Kamena 2015 y’ifatanyije n’abaturage bo mu karere ka Gisagara mu murenga wa Musaha kwibuka abazize Jenoside yakorewe Abatutsi, banabagenera miliyoni zirindwi z’amafaranga y’u Rwanda.

Minisitiri w’Umuco na Siporo Julienne Uwacu yavuze ko uruzinduko rwabo rudasanzwe kuko baje kubasura ngo bibuke Abazize Jenoside yakorewe Abatutsi.

Yagize ati “Njyewe n’abo twagendanye twabonye ko dukwiye kugira umwanya wihariye wo kwifatanya n’Abanyarwanda kwibuka, akaba ari muri urwo rwego twaje. Twaratoranyije aka karere kugira ngo tubabwire ko aho turi tuzirikana ko muhari ndetse tuzi n’ibikomere Jenoside yabasigiye.”

Yababwiye ko kwibuka Jenoside yakorewe Abatutsi hari icyo bifasha abakiriho ndetse n’igihugu, asaba guharanira ko amateka mabi yabaye i Musha atazongera kubaho ukundi,.

Uwacu yavuze ko kuba abakoze Jenoside batarageze ku mugambi wabo wo gutsemba Abatutsi atari impuhwe babagiriye ko ahubwo hari ingabo zitanze zigahagarika Jenoside bamwe bakemera no kugwa ku rugamba.

Nubwo ibikorwa bikorerwa abacitse ku icumu bitabagarurira ababo babuze, Min. Uwacu yavuze ko bituma bataguma mu maganya.

Yagize ati “Abakoze Jenoside baratsinzwe bagomba gutsindwa burundu, igihe abarokotse Jenoside bahorana agahinda bakabaho nabi byashimisha bamwe bakoze Jenoside.”

Veneranda Nyiranzarubara umwe mu bacitse ku icumu bo muri uyu murenge wa Musha  yatanze ubuhamya avuga ko Jenoside yabaye muri Musha ari kimwe n’iyabaye ahandi hose mu gihugu, ashima uburyo Leta yafashije abarokotse kwiyubaka, ariko anagaragaza ko hari ibyo bagikeneye nko gusanirwa inzu.

Innocent Mvukiyehe Umunyamabanga nshingwabikorwa w’umurenge wa Musha yavuze bafite imiryango y’abacitse ku icumu 316 igizwe n’abantu 653, muri yo 145 ihabwa inkunga y’ingoboka,  icyenda igizwe n’inshike zihabwa inkunga y’ingoboka yihariye.

Yakomeje avuga ko abacitse ku icumu bo mu murenge wa Musha bataheranwe n’agahinda ko ahubwo bitabiriye umurimo, ariko bakaba bakeneye gusindagizwa kugira ngo uyu munsi babashe kugera aho abandi bageze.

Uyu muyobozi yanavuze kandi ko amacumbi abacitse ku icumu batuyemo yubatswe huti huti Jenoside igihagarikwa muri 1995 yubakwa ku nkunga ya PAM yubakishwa amatafari ya rukarakara, uyu munsi ngo arashaje n’amabati yarangiritse ngo byari bikenewe ko asanwa.

Mvukiyehe kandi yanasabye ko ku kijyanye n’imanza zitari zarangizwa, Abacitse ku icumu bafashwa kubona inyandiko zabo aho zishyinguye kugira ngo nibiba ngobwa habe hanaterwaho Cashet mpuruza babashe kwishyurwa

Muri iki gikorwa hatanzwe amabati 1800 bababwiye ko bazayabagezaho vuba, miliyoni zirindwi z’amafaranga y’u Rwanda yo kuzabafasha gushyiraho ayo mabati, imiryango 10 ikaba yagenewe bimwe mu bikoresho by’ibanze.

Hon.Uwacu yasabye ubuyobozi bw’akarere ko ibyo bibazo byagaragajwe byakemurwa bikava munzira.

Iki gikorwa cyakozwe n’abayobozi bafatanyije n’abakozi b’ibigo bishamikiye kuri minisiteri y’umuco na siporo birimo Ikigo cy’ingoro ndangamurage n’amateka, Inteko y’Ururimi n’Umuco n’Ikigo cy’intwari z’igihugu ku bufatanye na Komisiyo ishinzwe kurwanya Jenoside (CNLG).

Joselyne UWASE
UM– USEKE.RW