Gisagara: Abahinzi b’urutoki ngo akarere kababujije kwenga none babuze isoko

*Uruganda rutunganya umusaruro ukomoka ku bitoki rurashinjwa kugurira bamwe…

Bamwe mu bahinzi b’urutoki mu murenge wa Mukindo mu karere ka Gisagara bavuga ko ubuyobozi bw’akarere bwababujije kwenga, bukabizeza kubashakira isoko ry’ibitoki none amaso yaheze mu kirere. Uruganda rutunganya umusaruro ukomoka ku bitoki rwaratangiye ariko ngo rugurira bamwe abandi ntirubagereho.

Aba baturage bavuga ko umutobe n’urwagwa bakuraga muri izi ntoki zabo ari byo bakuragamo bimwe mu byo bakenera nko kwishyurira abana babo amashuri n’ubwisungane mu kwivuza, n’ibindi byo mu rugo nk’akunyu, agasukari n’ibindi bikoresho.

Mu murenge wa Mukindo ni kamwe mu duce twiganjemo igihingwa cy’urutoki mu karere ka Gisagara, gusa abahinga iki gihingwa muri uyu murenge baravuga ko ubuzima butaboroheye nyuma y’aho ubuyobozi bw’akarere bubaburije kwenga bubizeza isoko.

Bizimana Jean Marie Vianney utuye mu kagari ka Mukiza mu Murenge wa Mukindo agira ati ” Twari dutunzwe n’urutoki, ubu akarere katubujije kwenga ngo hari uruganda ruzatugurira ibitoki, ariko ntiturabona baza kubigura, ubu nta soko dufite. »

Ibi bivugwa n’abatuye mu murenge wa Mukindo bihabanye n’ibitangaza n’abatuye mu yindi mirenge bo babyinira ku rukoma ko nyuma y’aho hatangirijwe uruganda rutunganya umusaruro ukomoka ku bitoki babonye isoko riri kubafasha kwikura mu bukene.

Aba bavuga ko ubusanzwe ikilo cy’igitoki cyaguraga 70 Frw ariko uru ruganda ruzwi nka RABI rubagurira kuri 100 Frw iyo rwaje kubyitwarira na 120 cyangwa 125 Frw mu gihe wabibashyiriye.

Ubuyobozi bw’akarere na bamwe mu baturage batunga agatoki uru ruganda kudashyiraho ingamba zihamye zo kugura ibitoki byera muri aka karere ka Gisagara ndetse rukagurira bamwe abandi rukabirengagiza.

Umuyobozi wungirije w’akarere ushinzwe iterambere ry’ubukungu, Hanganimana Jean Paul avuga ko nabo babibona ko uruganda rutashyizeho uburyo bunoze bwo gukusanyaga umusaruro w’abaturage.

Hanganimana avuga ko ubu hashyizweho uburyo buzatuma uru ruganda ruzajya rugura umusaruro w’ ibitoki muri buri murenge.

Ati ” Twashyizeho uburyo hajya hakusanywa ibitoki muri buri murenge uruganda rukajya kubigura byagwiriye, ariko ntibirakorwa turavugana n’uruganda rutange umunsi nyawo ruzajya rugira mu mirenge natwe tubimenyeshe abaturage.”

Intumwa za rubanda (Abadepite) zasuye aka karere muri iki cyumweru bavuze ko bagiye gukurikirana ko izi ngamba zo kugura umusaruro w’ bitoki zafashwe n’ akarere zizashyirwa mu bikorwa.

Christine NDACYAYISENGA
UM– USEKE.RW/GISAGARA