Gambia: Yahya Jammeh yagejeje ijambo ku baturage, nta byo kurekura ubutegetsi

Perezida wa Gambia, Yahya Jammeh yaraye agejeje ijambo ku batuye igihugu abasaba ko bategereza umwanzuro w’Urukiko rw’Ikirenga kuko ngo nirwo ruzemeza uwatowe nka Perezida.

Ijambo rye ryakurikiye umwanzuro w’Urukiko rw’Ikirenga uvuga ko ruzaterana muri Gicurasi 2017 kugira ngo abacamanza basuzume ikirego cyatanzwe n’ishyaka rya Perezida Jammeh risaba ko amatora yasubirwamo.

Urukiko rw’Ikirenga rwimuriye urubanza muri Gicurasi kugira ngo Perezida uzayobora abandi bacamanza azaboneke kuko ku wa kabiri ntiyabashije kuboneka.

Kuri Televiziyo y’Igihugu, Yahya Jammeh yamaganye kwivanga kw’ibihugu by’amahanga mu kibazo cy’amatora, byatangajwe ko yatsinzwe n’Umunyemari Adama Barrow wo ku ruhande rutavuga rumwe na Leta.

Yahya Jammeh yavuze ko yashyizeho umuhuza mu bibazo bya Gambia, akaba yasabye Minisiteri y’Ubutabera n’Inteko Nshingamategeko gushyiraho itegeko ry’imbabazi rusange kugira ngo hatazabaho ubushyamirane, asaba abanyepolitiki kwigengesera mu mwuka mubi uri mu gihugu cye.

Jammeh yavuze ko we n’ishyaka APRC bahisemo kwanga ibyavuye mu matora kubera amakosa yagaragayemo adafite ubusobanuro.

Yavuze ko Urukiko rw’Ikirenga rwonyine ari rwo ruzemeza ugomba kuba Perezida.

Ati “Ndasaba buri wese kubaha itegeko ry’Urukiko rw’Ikirenga rw’igihugu cyacu, kandi dutegereze umwanzuro w’Urukiko rw’Ikirenga ruzafa ku bijyanye n’ibyavuye mu matora.”

Jammeh yamaganye ibihugu by’amahanga ngo byivanga mu buryo bukomeye mu bibera mu gihugu cye, ngo bakaba bakwiza amakuru atari yo.

Yashinje Umuryango w’Abibumbye (UN) n’Umuryango wa Africa y’Iburengerazuba (Ecowas) gufata ibyemezo bihubukiweho mu bijyanye n’amatora yabaye muri Gambia.

Jammeh yavuze ko Leta ikwiye kwerekana ubudahangarwa bwo gukurikiza amategeko n’itegeko nshinga mu minsi mike iri imbere.

Tariki ya 19 Mutarama, Yahya Jammeh yakabaye arangije igihe cy’imyaka 22 yayoboye Gambia, ndetse uwo Komisiyo y’Amatora yatangaje ko yatsinze nka Perezida Adama Barrow yavuze ko icyo gihe nikigera azahira aba Perezida wa Gambia bidasubirwaho.

Yahya Jammeh yari yabanje kwemera ko yastinzwe amatora y’Umukuru w’Igihugu, nyuma aza gutangaza ko habayemo amakosa bityo ko amatora agomba gusubirwamo.

BBC

UM– USEKE.RW