Gambia: Ingabo za Senegal ziteguye gukuraho Yahya  Jammeh

Igihugu cya Senegal cyiteguye gukuraho Perezida wa Gambia, Yahya Jammeh igihe cyose yaba yanze kurekura ubutegetsi ku munsi wa nyuma wa manda ye tariki 19 Mutarama 2017, nk’uko byemejwe n’umwe mu bayobozi b’Umuryango w’Ubukungu muri Africa y’Iburengerazuba Ecowas.

Ingabo ziteguye “Stand-by forces” ziryamiye amajanja ku kuba isa n’isaha zakoherezwa kujya gushyira mu bikorwa ugushaka kw’abaturage muri Gambia igihe imishyikirano yatangijw ena Perezida wa Nigeria, Muhammadu Buhari, yaba itagize icyo igeraho mu kwemeza Perezida Yahya Jammeh kurekura ubutegetsi nk’uko byatangajwe na Marcel Alain de Souza, ukuriye Komisiyo ya Ecowas.

Souza yongeyeho ko Ecowas atariyo ishaka kwatsa umuriro mu karere, ahubwo ngo niba Perezida Yahya Jammeh akunda abaturage b’igihugu cye, akwiye gushyikirana ashaka inzira yasohokeramo, akava ku butegetsi mu mutuzo.

Marcel Alain de Souza ati “Nibitabasha kuba (Jammeh kurekura ubutegetsi), hazakoreshwa imbaraga zose zishoboka.”

Perezida Yahya Jammeh mbere yemeye ko yatsinzwe amatora n’Umuherwe Adama Barrow mu mibare yari yatangajwe tariki ya 1 Ukuboza, ndetse ahamaara uwamutsinze amwifuriza ishya n’ihirwe, gusa nyuma y’icyumweru yatangaje ko atakemeye ibyavuye mu matora kubera ibyo yita ‘amakosa akomeye’.

Ishyaka rye ryiyambaje Urukiko rw’Ikirenga ngo rumurenganure, rufata icyemezo ku gusubirishamo amatora, ariko iburanisha ryashyizwe tariki 10 Mutarama.

Amajwi menshi harimo ba Ambasaderi 11 ba Gambia yasabye Perezida Jammeh kurekura ubutegetsi, ariko we avuga ko hakenewe Komisiyo ifite ubutabera bw’Imana ikazayobora amatora, kandi ngo nta muntu wamutsinda uretse Imana.

BBC

UM– USEKE.RW