Gakenke: Bakiranye Kagame urugwiro, bamusaba imihanda, ivuriro, …arabibemerera

*Imihanda bakora naje, ntabwo aribyo,

*Abayobozi barya ibyagenewe gufasha abaturage turabahagurukira vuba,

*Ivuriro rya Gatonde ryemerewe abaturage mu 1999 hari na bamwe muri mwe ryemewe mutaravuka,

*Abayobozi mujye murangiza ibibazo igihe abo mwandikeye batabikemuye, nyuma na bo bazajya babibazwa.

Kuri uyu wa kane, ibihumbi by’abaturage baturutse mu mirenge 11 y’Akarere ka Gakenke, n’imirenge y’uturere bihana imbibi nk’uwa Rugendabari muri Burera, uwa Base muri Rulindo, n’abavuga rikijyana bo mu Ntara y’Amajyaruguru bakoraniye mu kibuga cya Nemba, bakirana Perezida Paul Kagame urugwiro rudasanzwe, bamugezaho ibibazo kandi ahava abikemuye. Kagame yikomye cyane abayobozi barya imfashanyo zigenewe abaturage.

Wari umwanya ku baturage b’Akarere ka Gakenke wo kumurikira Perezida Kagame imihigo besheje, kumubyinira, kumutura ibisigo no kumwereka ko bishimiye byinshi amaze kubagezaho.

Umuyobozi w’Akarere ka Gakenke ubu gatuwe n’abaturage 338 234, Deogratias Nzamwita yagaragarije Perezida byinshi Akarere kamaze kugeraho birimo umutekano usesuye, ndetse n’iterambere mu bukungu n’imibereho myiza.

Akarere ka Gakenke ubu ngo kamaze guhuza ubutaka bwa Hegitari (Ha) 46 000 zihingwaho ibigori, ingano, inanasi, Marakuja, kawa n’ibindi, ariko ngo harabura Ha 8000 z’amaterasi.

Nzamwita mu izina ry’abaturage kandi yashimiye Perezida kuba ubu abagera kuri 15.2% bafite umuriro w’amashanyarazi bavuye hafi kuri 1%, kandi ngo aya mashanyarazi bayabyaje umusaruro ku buryo hahanzwe imirimo mishya igera ku 19 691.

Mu burezi, aho gahunda y’uburezi kuri bose itangiriye, Gakenke ifite ibigo by’amashuri yisumbuye 56 bya Leta na bitanu (5) byigenga, bivuye kuri 14; amashuri  abanza yo ngo ni 116.

Akarere ka Gakenke kandi ngo kitabira ubwisungane mu kwivuza bugera ku kigero cya 91.71%, ariko ngo ntibihagije kuko bagomba kugera 100% nk’uko umuyobozi wako yabivuze.

Nubwo ibyiza ngo bamaze kugeraho ari byinshi, Deogratias Nzamwita yagaragarije Perezida ko Akarere kagihura n’ikibazo cy’ubuhahirane kubera kutagira imihanda, bityo asaba ko Gakenke na yo yakubakirwa imihanda muri gahunda ya ‘feeder roads’, ikorera mu tundi turere tw’igihugu.

Uyu muyobozi w’Akarere ka Gakenke kandi yasabye ko bahabwa ikigo cyigisha imyuga kuko bafite abana benshi bitabira uburezi ku kigero cya 99.2%, ariko babaka batabona amahirwe yo kwiga imyuga.

Mu ijambo rye, Perezida Paul Kagame yabwiye abaturage bari bateraniye ku kibuga cy’Umurenge wa Nemba mu kagari ka Mucaca mu mudugudu wa Gatare, ko yishimiye kuba yaje kuganira uko bakomeza kubaka igihugu, kandi abasaba gufatanya n’abayobozi.

Ati “Nubwo hari byinshi bikeneye gukorwa, hari n’ibyo mu maze kugeraho mu mbaraga zanyu, ndabashimira. Ngira ngo nabasabe ko twubakira kuri ibyo bimaze kugerwaho tukagera no ku bindi dutegereje, kandi harimo byinshi bishoboka twanageraho vuba, akenshi bitinzwa n’ibitari ngombwa, imikorere itari myiza, itihuta.”

Kagame yanenze cyane uko abayobozi baherana amafaranga agenewe kwishyura abaturage

Perezida Kagame yagarutse ku kibazo cy’abaturage bimuwe ahari hagiye kunyuzwa ibikorwaremezo by’umuriro w’amashanyarazi ariko imyaka ikaba yari ibaye ine batarishyurwa.

Yavuze ko nubwo bumvise ko agiye gusura aka Karere bakayazana, ngo abari bamaranye imyaka ine Miliyoni 62 zagombaga kwishyurwa abaturage nk’inguranye y’ibyabo bagomba kubibazwa hakamenyekana impamvu byatinze, ndetse bakanatanga inyungu y’imyaka ine bayamaranye kuko ngo bigaragara ko bari bayafite.

Ibyo byo gukorera ku jisho n’igitsure cy’Umukuru w’Igihugu, Perezida Kagame yongeye kubivugaho anenga uburyo aho agiye gusura babona yaje bakubaka imihanda hari hashize igihe kirekire barayemereye abaturage ntibayubake.

Perezida Kagame ubwe yabajije impamvu ivuriro rya Gatonde ritubakwa

Perezida wa Repubulika ubwe, yabajije impamvu ivuriro rya Gatonde, ryemewe mu mwaka wa 1999, ariko n’ubu rikaba ritarubakwa. Perezida yagize ati “Hari ibintu byinshi ntashobora kumva, nk’ibyasezeranyijwe mu 1999, bamwe bari hano bataravuka ndabona n’ubu bitarakunda, nk’Ivuriro ryo muri Gatonde ryasezeranyijwe muri 99 kuki ritubakwa?”

Yahize asaba Minisiteri y’Ubuzima kugira icyo ivuga, maze Dr Ndimubanzi Patrick Umunyamabanga wa Leta muri Ministeri y’Ubuzima, avuga ko muri Gakenke hari amavuriro abiri, ariko n’iryo rihita rybakwa.

Perezida Kagme yongeye kunenga cyane abayobozi badakemura ibibazo kubera ko ngo hari inzego bandikiye ntizagira icyo zikora. Yemereye Umuyobozi w’Akarere ka Gakenke kujya aza kumubwira uko ibyo yabemereye birimo gukorwa “direct” nta handi abanje kunyura.

Ati “Ndaza guhangana n’abatuma ibintu bidakorwa, iyo ibintu bidashoboka biba byumvikana ariko iyo ibintu bishoboka nta mpamvu yo kubitinza.”

Perezida kandi yemereye abaturage b’Akarere ka Gakenke gukomeza kubafasha muri byinshi birimo ubuhinzi n’ubworozi, ariko abasaba ko uruhare rwabo mu gukora rugaragara na Leta igakora ibyayo.

Ati “Namwe rero ndabasaba ko mu mikorere twarushaho gukora neza, tugakora ibidufitiye inyungu, … na none birasaba kuzuzanya… Mugakora uko mushoboye, mugakora neza,…Tudakoze dutyo twahora twifuza, ntabwo twagera ku byo twifuza kugeraho.”

Kagame yemereye Gakenke kuzamura umubare w’abafite amashanyarazi

Ku mubare w’abafite umuriro w’amashanyarazi, Perezida Kagame yavuze ko 15% bakiri bake cyane, ndetse abasezeranya gukora ibishoboka byose mu Karere ka Gakenke bakabona umuriro ari benshi.

Ku byerekeranye n’ikibazo cy’imihanda, Kagame yavuze ko mu gihe muri Gakenke barwana no kubaka imihanda ya Feeder Roads y’igitaka ahandi bakataje bubaka kaburimbo, asaba Minisitiri w’Ibikorwa remezo, Musoni James kugira icyo abivugaho.

Aha, Minisitiri Musoni James yavuze ko hateguwe Miliyari imwe y’amafaranga y’u Rwanda (1 000 000 000 Frw) yateganyirijwe gukora indi mihanda hano muri Gakenke, nyuma y’uwa km 30 wubatswe muri Janja.

Mu gusoza, Perezida yababwiye ko imihanda, amashanyarazi, amavuriro, iby’ubuhinzi n’ubworozi n’ibindi bakeneye aza kubikemura, ku buryo na bo ngo nibabishyiramo imbaraga baza kubona impinduka vuba.

Abemerera kuzongera kubasura akareba aho bigeze, na bo abasaba gukomeza gushyireho akabo nk’uko babikoze bigatuma akarere ka Gakenke kagira umutekano katahoranye mu bihe by’Abacengezi.

Amafoto/HATANGIMANA/UM– USEKE

Ange Eric HATANGIMANA
UM– USEKE.RW