Etincelles yazanye umutoza Seninga na rutahizamu Kambale ngo yiteguye APR FC

Nyuma yo kubona umutoza mushya Seninga Innocent wavuye muri Kiyovu Sports, ikanagura abakinnyi batandatu (6) bashya barimo rutahizamu Kambale Salita Gentil, na Ndikumana Bodo, Etincelles ngo yiteguye imikino yo kwishyura irimo uwa APR FC iza guheraho.

Etincelles FC ubu iri ku mwanya wa 15 mu makipe 16 agize Shampiyona y’u Rwanda yakoze impinduka kandi ngo irashaka kurangiriza Shampiyona mu myanya y’imbere.

Iyi kipe yo mu Karere ka Rubavu yasinyishije Seninga Innocent nk’umutoza mukuru wayo amasezerano yo kuyitoza mu mikino yo kwishyura ya Shampiyona. Yazanye umutoza w’abanyezamu nawe yavanye muri Kiyovu sports,  Maniraguha Jean Claude, bombi bakazafatanya na Mutarambirwa Djabil (usanzwe ari umutoza wungirije).

Etincelles kandi yaguze abakinnyi bashya barimo abasanzwe bazwi cyane nka Kambale Salita Gentil (bitaga Pappy Kamanzi akiri muri Rayon Sports), Ndikumana Bodo wavuye muri Rayon Sports, Habimana Hussein na Gakuru Jean Claude bavuye muri Mukura VS, Ingabire Aime Regis wahoze ari umunyezamu wa AS Kigali, uyu agiye muri Etincelles nyuma y’imvune ikomeye yavuriwe muri Algerie.

Nk’uko twabitangarijwe na Seninga Innocent, ngo Etincelles FC yarahindutse kandi ngo utarayitsinze mbere azitonde.

Seninga avuga ko hari byinshi amaze guhindura mu ikipe mu gihe gito ahamaze, ati “Abakinnyi nahasanze si babi cyane, ariko muri ‘technique’ ntabwo bari bahagaze neza. Byansabye gukora cyane. Nahasanze ikibazo muri ba rutahizamu, niyo mpamvu mubo nasinyishije harimo Kambale na Bodo. Ubushobozi bwabo mu gutsinda ibitego ndumva budashidikanywaho. Twiteguye neza umukino wa APR, kandi na ‘retour’ yose bazabona Etincelles  nshya.”

Seninga yatubwiye ko abakinnyi bashya bose Etincelles yaguze baza kugaragara ku mukino baza guhuramo APR FC ya mbere ku rutonde rw’agateganyo rwa Shampiona. Ni umukino wo kwishyura uba kuri uyu wa gatanu Saa cyenda n’igice (15h30), kuri Stade ya Kigali i Nyamirambo).

Umukino ubanza wahuje aya makipe yombi, warangiye APR FC itsindiye Etincelles i Rubavu igitego kimwe ku busa (1-0) cya Bizimana Djihad.

Indi mikino iteganyijwe mu mpera z’iki cyumweru

Kuwa gatanu tariki 15 Mata 2016

SC Kiyovu irakira Bugesera FC (Mumena);
Espoir vs AS Muhanga (Rusizi)
APR FC vs Etincelles (Stade de Kigali)
Amagaju FC vs Gicumbi FC (Nyamagabe)

Ku cyumweru tariki 17 Mata 2016

Police FC vs Mukura VS (Kicukiro);
Rwamagana City vs AS Kigali (Rwamagana ikibuga cya Police);
Rayon Sports vs Marines FC (Stade de Kigali);
Musanze FC vs Sunrise FC (ikibuga cy’i Nyakinama).

Ngabo Roben
UM– USEKE.RW