Bitunguranye!!! Davido ahuriye na Perezida Kagame ku kibuga cy’Indege

Umuhanzi wo muri Nigeria uje kwifatanya n’abakunzi ba muzika igezweho bo mu Rwanda kwizizhiza ku nshuro ya 20 umunsi wo Kwibohoza, muri iri joro ubwo yari ageze ku kibuga cy’Indege agize amahirwe yo kuhahurira na Perezida Kagame n’umuryango we bararamukanya.

Davido amaze gusohoka mu kibuga cy’Indege yavuganye gato cyane n’abanyamakuru mazea yinjira mu modoka yari yamuteganyirijwe we n’ikipe bazanye.

Umunyamakuru w’Umuseke wabarebaga anafotora ahindukiye inyuma, byamutungura cyane kubona Perezida Kagame, abana be n’umugore we Jeannette Kagame bagenda n’amaguru aho ku kibuga cy’indege basa n’abaje nabo kwakira cyangwa gusezera umuntu w’inshuti.

Umuhanzi Davido wari umaze kwinjira mu modoka nawe yahise ayisohokamo abonye Perezida,  arabakurikira asaba ko baramukanya gato.

Perezida Kagame yahagaze we n’umuryango we baramutsa uyu muhanzi wagaragaje ibyishimo cyane, mu magambo umunyamakuru w’Umuseke yabashije kumva Davido abwira Perezida Kagame yagize ati “You really have a peaceful and beautiful country president.”

Perezida Kagame amwenyura yashimiye uyu muhanzi amubwira amagambo amuha ikaze, anamubwira ko baba bari kumwe mu gitaramo cyo kuri uyu wa 04 Nyakanga nyuma y’imihango y’umunsi wo Kwibohora.

Bamaranye umwanya muto cyane utageze ku munota umwe, uyu muryango wa Perezida urakomeza utambuka n’amaguru nk’abandi bantu bose binjira ku kibuga cy’indege kwakira cyangwa gusezera abavuye mu mahanga.

Davido w’imyaka 21, kimwe n’abahanzi bo mu Rwanda nka Jay Polly, Amag the Black, Urban Boys na Dream Boys bazataramira abanyarwanda nyuma y’imihango y’uyu munsi.

Photos/Plaisir MUZOGEYE/UM– USEKE

Plaisir MUZOGEYE
ububiko.umusekehost.com