CECAFA: Rayon vs APR, abatoza bombi barahiga

Abatoza bombi ni bashya, nibwo bwa mbere bagiye guhura ku mukino uvugisha benshi mu Rwanda. Gusa buri mutoza arahiga ko azandagaza undi ku mukino wa 1/4  cya CECAFA Kagame Cup kuri uyu wa 19 Kanama i Nyamirambo.

Umubiligi Jean Francois Losciuto yabwiye abanyamakuru ko azi neza ikipe ya APR FC kandi agomba kuyiyereka kuri uyu mukino.

Ati “Umukino w’ejo ni nka Real Madrid na Barcelona zo muri Espagne, APR turayizi neza kandi tugomba kuyiyereka.”

umunya Seribiya utoza APR FC yatangaje ko ikipe ya Rayon Sports bayiteguye. Ibi yabivuze ku munsi w’ejo nyuma yo gutsindwa na KCCA yo muri Uganda bigatuma APR irangiza ku mwanya wa kabiri mu itsinda B igahura ityo na Rayon ya mbere mu itsinda A.

Muri CECAFA Kagame Cup 2005 nibwo APR na Rayon ziheruka guhura muri iri rushanwa. imikino yari yabereye i Mwanza muri Tanzania, nabwo hari muri ¼ byarangiye amakipe yombi anganya igitego 1-1 hongerwaho iminota 30 birangira ikipe ya APR FC ariyo itsinze uyu mukino.

Umukino uheruka guhuza izi kipe zombi mu Rwanda hari mu gikombe cy’Amahoro mu kwa gatandatu uyu mwaka, APR FC yatsinze Rayon Sports 2 – 1.

I Nyamirambo kuri uyu wa 19 Kanama saa kumi n’imwe haraca uwambaye hagati ya Rayon y’i Nyanza na APR FC y’ingabo muri 1/4 cya CECAFA Kagame Cup.

Paul NKURUNZIZA
UM– USEKE.RW