Bugesera: Umuturage arashinja ubuyobozi kutita ku bibera mu gishanga cya Rurambi

Umwe mu baturage bafite imishinga mu gishanga cya Rurambi uvuga ko imicungire y’icyo gishanga kinini (ha 1000 zitunganyijwe) ituma kidatanga umusaruro cyakagombye gutanga bitewe n’uko abashoramari bashoboye ngo bananizwa n’ushinzwe gukurikirana abahinzi ari na we utanga ubutaka, gusa we ahakana aya makuru.

Uyu muturage witwa Mugabo Francois ni umwe mu banyamuryango ba Koperative CORIMARU ishinzwe gukorera imirimo y’ubuhinzi bw’umuceri mu gishanga Rurambi, avuga ko Agronome w’Umushinga PADAB akora ibyo ashaka mu gishanga, akagabira uwo ashaka ndetse akanyaga uwo ashaka.

Yagize ati “Agronome aho kurebera abahinzi ateranya abantu, aguha ubutaka agabishije icy’amaso (gutanga hatabayeho gupima ingano) ejo akaba yakwambura cyangwa akabwira undi muntu ashatse ati ‘fata hari uhinge’.”

Uyu muturage yemeza ko yanyazwe igice cy’ubutaka yari yahawe yaranamaze kugitangaho amafaranga yo kugitunganya, ngo cyahawe umupolisi (amazina ye arahari). Agronome ngo yazanye n’umuturage uvuga ko ahagarariye uwo mupolisi, aramubwira ati uzafate hariya.

Agronome ngo yakemuye ikibazo avuga ko uyu muturage ahabwa amafaranga 40 000 agatanga ubutaka yari yahinze, undi kubera ko ari umushoramari, wazanye imashini zo guhinga, kandi akaba yaratangiye imirimo ayo mafaranga ayatera utwasi asaba ko agumana ubutaka bwe yatunganyije.

Avuga ko akererezwa guhinga umuceri kandi ngo igihe ni iki cyo guhinga, ati “Abanyarwanda turangana imbere y’amategeko ni cyo Ndi Umunyarwanda ivuga, ntabwo Umupolisi cyangwa undi wese akwiye kurutishwa undi Munyarwanda.”

Igishanga cya Rurambi cyatanzweho amafaranga miliyari 12 yo kugitunganya, ndetse ngo hari andi miliyari ebyiri azatangwa na Leta kugira ngo icyo gishanga kizarusheho kugirira neza abaturage.

Uyu muturage avuga ko igishanga gifite ubuso bwa ha 1000 zitunganyijwe, ariko ngo gitanga umusaruro utaragera no kuri t 1000 mu gihe cyakaba gitanga izigera kuri toni esheshatu cyangwa umunani bitewe n’uko ngo ha 1 ihinze neza year toni ehsehsatu z’umuceri.

Ati “Iyo urebye umusaruro uva hano n’uwakabaye uhaboneka ni igihombo kuri Leta ukurikije amafaranga yatanzwe. Agronome abayobzi ba koperative baramuyinya kuko ari no muri Njyanama y’akarere amakuru abwiye abayobozi ni yo bafata uko, nta wamukoraho icyo avuze ni icyo.”

Abantu 14 ngo bishyize hamwe bafite amafaranga yabo, bashaka gushora imari mu buhinzi bw’umuceri, ariko ngo kubera imikorere idahwitse y’abashinzwe igishanga bamwe bacitse integer baragenda, ahanini ngo ubuyobozi buriho bukaba bwaragize ubwoba ko muri abo harimo abantu bize bakaminuza kandi bafite amafaranga bagatinya ko bazabatwara ubuyobozi bakabananiza.

Bamwe mu baturage bahinga muri icyo gishanga bavuga ko ikibazo cy’uyu muturage cyabayeho ariko ngo baheruka cyarakemuwe, ngo ntibari bazi ko kikiriho.

Habimana Jean Baptiste ukuriye itsinda rya kabiri (zone II), ari na yo Mugabo abarizwamo avuga ko iki kibazo kimurenze ngo kuko si we utanga ubutaka. Gusa abona ko kuba kidakemuka bishobora kudindiza uyu muturage ashinzwe ngo kuko we yari yatangiye guhinga.

Ku bijyanye n’uko umusaruro uva mu buhinzi bw’umuceri muri icyo gishanga ari muke, Habimana avuga ko byatewe ahanini no kuba ngombere bari bataramenya guhinga ariko ubu ngo bizeye ko uziyongera.

Yagize ati “Tumaze imyaka ibiri n’igice dutangiye guhinga umuceri, mbere byaratugoye aribwo tubitangiye, mu mwaka ushize twejeje t 600, nibura muri uyu mwaka tuzageza kuri t 1000.”

Silas Mbonigaba ni we Agronome uvugwa muri iki kibazo, avuga ko ikibazo cya Mugabo (amwita Francis) gishingiye ku kuba yarahuriye ku murima n’undi muhinzi bose bahawe ubutaka n’akarere, bityo ngo Mugabo aba ahagaritswe kugira ngo babanze bapime ubwo butaka buri wese abone ahe agomba guhinga.

Agronome avuga ko mu kujya gupima, basanze Mugabo yaramaze guhinga ha 6,8 kandi yemerwe eshatu, ariko ngo kuko hari umuvandimwe witwa William na we wemere ha 3, Mugabo ntiyagomba kurenza h 6, ubwo rero ngo Agronome yategetse ko ubwo buso bwahinzwe burengaho (ha 0,8) bwamburwa Mugabo ariko amafaranga yakoresheje akayasubizwa.

Muri rusange babaze mazutu, amafaranga ya mashini, ngo Mugabo bumvikanye ko asubizwa amafaranga 47 000, ariko ngo Mugabo Francis ntiyigeze asinya ku nyandiko bumvikanye aho.

Ati “Mbabwije ukuri nta kibazo nzi gihari, kuko maze kubapimira nta muntu wampamagaye ambwira ko afite ikibazo.”

Agronome ariko avuga ko bishoboka ko Mugabo yabonye ahawe ubutaka akabona ni bunini (ha 9) akumva ko bwose ari ubwe.

Ati “Namubwiye guhinga mu gihe nari ntegereje gupima kuko dukoresha GPS kuko decametre ishobora kwibeshya, ubwo ntiyumvise ibyo namubwiye.”

Iki kibazo cy’amakimbirane ashingiye ku nyungu mu gishanga cya Rurambi, Umuseke wakibajije Umuyobozi w’Urugaga rw’Amakoperative, Katabarwa Augustin avuga ko hari bamwe mu bahinzi baje nyuma muri icyo gishanga bagasanga ubutaka bwaratanzwe, bikabagora gukurikiza amategeko basanze.

Gusa yijeje Umuseke ko ikibazo cya Mugabo Francois agiye kugikurikirana kugera kirangiye burundu.

Amafoto/HATANGIMANA/UM– USEKE.RW

HATANGIMANA Ange Eric
UM– USEKE.RW