APR FC ubu niyo ifashe umwanya wa mbere, itsinze Mukura iyisanze i Huye

APR FC ubu niyo ifashe umwanya wa mbere wa shampionat by’agateganyo nyuma yo gutsinda Mukura Victory Sports iyisanze i Huye kuri stade yayo, umukino wa mbere ukomeye Mukura yari yakiriye kuri stade nshya. Rayon Sports yari kuguma ku mwanya wa mbere iyo itanganya na AS Kigali kimwe kuri kimwe, ni mu mikino y’umunsi wa 17 wa Shampionat.

APR FC igice cya mbere ntabwo cyayihiriye, Mukura yasatiriye cyane ndetse ku munota wa 21 rutahizamu wayo Emmanuel Ngama ayitsindira igitego igice cya mbere kirangira gutyo.

APR FC yagurutse mu gice cya kabiri yiminjiriyemo agafu, ihererekanya neza kurusha Mukura ndetse mu minota ya mbere y’iki gice cya kabiri Iranzi Jean Claude atsinda igitego cyo kwishyura ku ishoti ryasubizagamo umupira wari ugarutse umaze gukubita umutambiko w’izamu.

APR FC yakomeje kuyobora umukino mu gice cya kabiri ndetse ku munota wa 78 ibona igitego cya kabiri cy’inzizi cya Fiston Nkinzingabo bituma APR igira amanota 37 ikurikirwa na Rayon Sports y’amanota 36.

AS Kigali 1-1 Rayon Sports

Kuri Stade ya Kigali, i Nyamirambo ho AS Kigali yari yakiriye Rayon Sports zaguye miswi kimwe kuri kimwe (1-1), Manzi Thierry ku ruhande rwa Rayon Sports niwe wafunguye amazamu, Rutahizamu Sugira Ernest aza kwishyurira AS Kigali.

Uyu mukino watangiye AS Kigali ihuzagurika kubera igitutu cy’abafana ba Rayon Sports bendaga kuzura Stade, gusa Kapiteni Mabula akomeza gufasha ubwugarizi bwa AS Kigali gutuza.

Uretse abafana, Rayon Sports muri iyi minsi irimo gukina umukino wo gusatira kubera abasore bayo barimo Ismaila Diarra, Davis Kasirye, Nshuti D. Savio, na Kwizera Pierro bari mu bihe byiza.

Ku munota nk’uwa gatatu umukino ukirangira, Savio yarase igitego ari wenyine imbere y’izamu, ibi ariko ntibyaciye intege Rayon ahubwo byayeretse ko bishoboka ku Ikipe ya AS Kikali ikunze kubagora cyane.

Rayon Sports yakomeje gusatira izamu ku buryo mu minota 15 ya mbere yari yamaze kubona igitego cyatsinzwe na myugariro Manzi Thierry ku mupira w’umuterekano (free kick) watewe umuzamu wa AS Kigali ntiyabasha kuwufata kubera ubugufi, ndetse yahushije n’uburyo bwinshi bwabazwe.

Gusa, byagaragaraga ko Rutahizamu Sugira Ernest igihe icyo aricyo cyose ashobora kubona igitego mu izamu rya Rayon Sports kubera ba myugariro bayo bahuzamurikaga. Ariko ku rundi ruhande Diarra na Kasirye nabo bashakira Rayon ibindi bitego.

Habura iminota micye ngo igice cya mbere kirangire nko ku munota wa 38 Sugira Ernest yaje kwishyurira AS Kigali, igice cya mbere kirangira gityo.

Igice cya kabiri nta mpinduka nyinshi zakozwe ku mpande zombi, n’izabaye zaje umupira ugiye kurangira. Muri iki gice, Rayon Sports yakomeje kwataka cyane ariko ntibyayihira kuko nabwo yahushije ibitego byinshi byabazwe; AS Kigali nayo yavunikishije Sugira Ernest avamo, umukino urinda urangiye ntayongeye kureba mu izamu ry’indi.

Nyuma y’umukino Eric Nshimiyimana, utoza AS Kigali yavuze ko ku ikipe ye yari imaze iminsi ititwara neza, kubona inota rimwe kuri Rayon Sports yari iyoboye urutonde rwa Shampiyona ari byiza kuko ngo bigiye kuzamura Morale y’abakinnyi be.

Eric kandi asanga ngo AS Kigali itarava mu guhatanira igikombe cya Shampiyona kuko ikipe zimuri imbere zitaramusiga cyane.

Masudi Djuma we ngo yababajwe no kunganya, ndetse n’umukino mubi ngo atazi kuri Rayon Sports dore ko ngo AS Kigali yabashije kubakinisha umukino wayo wo hejuru badasanzwe bakina, ari nabyo ngo byatumye ibishyura.

Ati “Irya si Rayon Sports yakinaga, Rayon ntikina kuriya, ubundi dukina umupira wo hasi, wo guhererekanya cyane ariko uyu munsi nabonye umukino w’umuntu ku giti cye.”

Masudi ngo mu myitozo azakosora amakosa yabonye mu mukino w’uyu munsi dore ko anafite imikino ikomeye mu minsi iri imbere.

Masudi avuga no kuba abakinnyi bakina ku cyumweru, bakongera kugaruka mu kibuga kuwa gatatu nabyo ngo bishobora kugira ingaruka ku mikinire y’abakinnyi.

Imikino y’umunsi wa 17 uko irangiye:

Kuwa kabiri tariki 19, 04, 2016
SC Kiyovu 1 – 0 Espoir Fc (Mumena)
AS Muhanga 4 – 1 Amagaju (Stade Muhanga)

Kuwa gatatu tariki 20, 04, 2016
Sunrise FC 0 – 0 Marines FC (Rwamagana)
AS Kigali 1 – 1 Rayon Sports (Stade de Kigali)
Etincelles 2 – 1  Rwamagana City FC (Stade Umuganda)
Gicumbi FC 1 -1 Musanze FC (Gicumbi)
Mukura VS 1 – 2  APR FC (Stade Huye)
Bugesera FC 2 – 0  Police Fc (Nyamata)

Amakipe ya mbere uko akurikiranye mu manota ubu

1 APR FC                              37
2 Rayon                                36
3 Mukura                             32
4 Police FC                           31
5 AS Kigali                          30

Police FC i Nyamata ikipe ya Bugesera FC yayitsinze bibiri ku busa

AS Kigali yakiriye Rayon bigwa miswi

Iyi nkuru iri gutegurwa birambuye…..

Photos/Evode Mugunga&Roben Ngabo ©Umuseke

Roben Ngabo & Venuste Kamanzi
UM– USEKE.RW