Abayobozi bose bamenye ko umuturage afite AGATUZA atari nka kera-Prof Shyaka

*Prof Shyaka avuga ko gahunda yo kwegereza ubuyobozi Abaturage itagira abayobozi abamalayika,
*Abanya-Gakenke ngo ntawe ugikora urugendo ajya kuri ‘Komini’ cyangwa asiragire mu buyobozi,
*Bavuga ko ibiiza byabakomye mu nkokora…

U Rwanda rwifatanyije n’ibindi bihugu byo muri Afurika kwizihiza umunsi ngarukamwaka wahariwe kuzirikana kuri gahunda yo kwegereza ubuyobozi n’Ubushobozi abaturage. Prof Shyaka Anastase uyobora ikigo cy’igihugu cy’Imiyoborere avuga ko umuyobozi ugifite imyumvire yo gusuzugura umuturage yarya ari menge kuko abaturage bamaze kumenya uko bakoresha ijambo bahawe kubera iyi gahunda.

Nzamwita Deogratias uyobora akarere ka Gakenke kizirijwemo uyu munsi, avuga ko kuva mu mwaka wa 2011 kugeza 2014 ubukene bwagabanutse ku kigero gishimije kuko bwavuye kuri 56% bugera kuri 42%.

Uyo muyobozi avuga kandi ko mu myaka itatu yari yabanjirije 2014, abantu 64% babarirwaga munsi y’umurongo w’ubukene mu gihe ubu abari mu bukene bukabije babarirwa kuri 16% bavuye kuri 30.9%.

Umuyobozi w’ikigo cy’igihugu cy’imiyoborere, Prof Shyaka Anastase avuga ko ibi bitapfuye kugerwaho kuko ari umusaruro wa politiki yo kwegereza ubuyobozi n’ubushobozi abaturage yatumye bagira ijambo bakagaragaza ibitagenda neza.

Iyo Umukuru w’igihugu cyangwa abandi bayobozi bakuru nka Minisitiri w’Ubutegetsi bw’igihugu basuye abaturage, hakunze kumvikana bamwe mu bayoborwa babaregera abayobozi bo mu nzego z’ibanze batubahiriza inshingano batorewe.

Prof Shyaka ukomeza avuga ko ibi nabyo byari mu ntego za gahunda yo kwegereza ubuyobozi n’ubushobozi abaturage, agira ati “ …Twifuza ko umuturage agira ijambo, iryo jambo yamaze kurifata.”

Uyu muyobozi uvuga ko Leta y’u Rwanda yifuza ko abaturage batinyuka abayobozi babo ariko batabahangaye, avuga ko Abanyarwanda bamaze igihe kinini bakandamizwa igihe kinini na Leta zabanje. Ati “ Iyo umuyobozi yakosaga kera, umuturage akabigaragaza baramubwiraga bati watubeshye…”

Akomeza agira inama bamwe mu bayobozi bakomeje kurangwa no gukandamiza ababatoye kuko ari bo bazafata iya mbere mu kubagaragaza no kubakura kuri iyi myanya.

Ati “ Igisigaye ni uko abayobozi bose bamenya ko umuturage afite AGATUZA ntabwo ari bya bindi byo gupfa kumukinisha nka bya bindi bya kera, ubu umuturage afite  imbaraha, afite ijambo mu gihugu cye, afite uburenganzira bukomeye…muyobozi utarava ku giti ngo uge ku muntu ufite ikibazo.”

Uyu muyobozi wa RGB ugaruka kuri amwe mu makosa akorwa na bamwe mu bayobozi, avuga ko gahunda yo kwegereza ubuyobozi abaturage itaje guhindura kamere z’abantu kuko itabuza uwokamwe no gukora nabi kubikora. Ati “ Iyi gahunda ntabwo igira abayobozi Abamalayika…”

AbanyaGakenke ngo ntawe ugikora urugendo agiye kuri Komini…

Nsengiyumva Focus utuye mu kagari ka Buheta, mu murenge wa Gakenke avuga ko kera hatarakorwa ivugururwa ryo kwegereza ubuyobozi abaturage, bakoraga urugendo rurerure kugira ngo bahabwe serivisi mu nzego z’ubuyobozi.

Uyu muturage uvuga ko ibi byabaye amateka kubera kwegerezwa ubuyobozi, agira ati “ Ntawe ukijya kuri Komini ngo agiye kurega, ntawe ukijya kuri segiteri, ubu umuyobozi w’umudugu n’abaturage bagucira urubanza rukarangira.”

Nyirandihe Venantie utuye mu kagari ka Nganzo, mu murenge wa Gakenke, avuga ko kwegerezwa ubuyobozi byatumye ubuzima bwabo bukurikiranwa umunsi ku wundi.  Ati “ Abayobozi turi kumwe na bo, bazi uko turya n’uko turara,…imanza z’abagore n’abagabo barazikemura.”

Nyirandihe avuga ko hari byinshi bari bamaze kugeraho kubera kwegerezwa ubuyobozi ariko ko byakomwe mu nkokora n’ibiiza by’imvura nyinshi iherutse kwangiza ibikorwa byinshi muri aka karere,ikanahitana ubuzima bwa bamwe.

Uyu munsi nyafurika wo kweregeza Ubuyobozi n’ubushobozi abaturage, wahawe insanganyamatsiko igira iti ‘Imiyoborere ibereye abaturage ni inkingi y’iterambere rirambye’, ubaye mu gihe Abanyarwanda bamaze igihe gito bamaze kwitorera abayobozi b’inzego z’ibanze.

Martin NIYONKURU
UM– USEKE.RW