Abaturage muri Sake bishatsemo amafaranga ngo babone amashanyarazi REG irayabasubiza

Hari abaturage batuye mu murenge wa Sake akarere ka Ngoma mu Ntara y’Uburasirazuba binubira kuba barirengagijwe mu gihe bari bikusanyirije amafaranga yo gukurura umuriro kugira ngo biteze imbere ariko ngo baza gutungurwa n’uko amafaranga milioni eshatu bari bakusanyije bayasubijwe aho kugira ngo Leta ibunganire.

Ubuyobozi  bw’akarere ka Ngoma kuri iki kibazo burasaba ikigo cy’igihugu gikwirakwiza amashanyarazi, REG guha aba baturage umuriro nta yandi mananiza, kandi nta mafaranga bazongera gutanga kuko ayo batanze mbere yateshejwe agaciro.

Aba baturage bo mu murenge wa Sake bavuga ko bashishikajwe n’iterambere ryiza u Rwanda ruberekezamo, ngo na bo barifuje kubigiramo uruhare bikururira umurimo w’amashanyarazi aho umudugudu umwe wakusanyije amafaranga milioni eshatu ariko ngo REG ibabwira ko bisaba nibura miliyoni 38.

Ibi ngo byaciye intege abaturage by’umwihariko kuko bahise basubizwa ya mafaranga aho kugira ngo akarere kabunganire nk’uko babivuga.

Umwe muri aba baturage agira ati “Twigeze kwishyira hamwe dukusanya amafaranga agera kuri miliyoni ebyiri n’ibihumbi magana inani (Frw 2, 800, 000) nyuma twaje kubabara tubonye tuyasubijwe aho kuduha umuriro cyangwa ngo n’akarere katwunganire.”

Aya mafaranga bari bakusanyije nk’uko bivugwa n’ubuyobozi bw’umurenge wa Sake ngo ntabwo yakirwaga n’ubuyobozi, ahubwo abaturage bari baritoyemo komite ibishinzwe hagati muri bo.

Niyonkuru Benoit umuyobozi w’ikigo cy’igihugu gishinzwe gukwirakwiza amashanyarazi (REG) mu karere ka Ngoma, asobanura ko akarere katigeze gakurikirana amasezerano bagirana na REG ngo kuko na we ubwe nta kopi bigeze bamuha ngo abe yakurikirana iki kibazo akaba ari ho ahera amakosa ayegeka  ku karere.

Niyonkuru ati “Habayeho ikibazo cya ‘Transfo’ ihenze, hari amasezerano akarere kagirana na REG buri mwaka bakareba aho bahera bakora amashanyarazi, niba yaranasinywe njye nta kopi nahawe, akarere kagomba kubikurikirana.”

Nambaje Aphrodise uyobora aka karere ka Ngoma na we ashyira mu majwi ikigo cya REG ngo kuko kidashyira mu nshingano ibyo kigomba gukora, akavuga ko aba baturage batagomba kurengana, ngo bagomba guhabwa umuriro nta n’amafaranga yandi batanze.

Nambaje ati “Ibyo kuvuga ngo akarere ntikamwandikiye …, hari inshingano za REG,  igomba kugeza iyo transfo ku baturage, kuko nk’ubu hari abo baherutse gusubiza bo muri Mugesera barababwira ngo mugende ibyo ntibizanashoboka, ibisubizo nk’ibyo byo guca intege abaturage…, ni mureke duhe abaturage ibikorwa by’ibanze kwishyirira amashanyarazi mu nzu na bo babyikorere, ariko aba baturage ntabwo ari bo bazishyura transfo.”

Uretse mu murenge wa Sake, hari no mu bindi bice bitandukanye nko mu murenge wa Murama, naho abaturage batanze amafaranga ariko bamaze imyaka hafi ibiri nta muriro barabona.

Elia BYUK– USENGE
UM– USEKE.RW