Abanyarwanda n’Abanyafurika ntabwo dukwiye kwemera kubana akaramata n’ubukene – Kagame

Ubwo yaganiraga n’Abavuga rikumvikana bakunze kwitwa Abavuga-rikijyana (opinion leaders) bo mu Karere ka Karongi no mu tundi Turere tw’Intara y’Uburengerazuba, Perezida Paul Kagame yasabye Abanyarwanda guhindura imyumvire niba bashaka kugera ku iterambere, bakumva ko batagomba kubaho nk’abantu bihebye cyangwa ko amajyambere yabasize.

Ikiganiro cya Perezida n’aba bayobozi mu nzego za Leta, amadini, ba rwiyemezamirimo n’abandi, cyibanze ku kubakangurira kubyaza umusaruro amahirwe bafite imbere mu gihugu, bibanzirizwano guhindura imyumvire.

Perezida yavuze ko hari amafaranga menshi u Rwanda rusohora rutumiza mu mahanga ibintu bishobora no kuboneka hano mu Rwanda ndetse n’ibindi u Rwanda rubanza kohereza hanze bigahindurwa bakabigarura babyongereye agaciro.

Ati “…Gukora, u Rwanda rushobora kugira byinshi rwakora ntiruhore ruvana ibintu hanze kandi rubifite,…gukora ibintu nk’ibyo bihera ku myumvire mbere na mbere.

Iyo utumvise ngo si ko bikwiye, ntabwo uzakora rwa ruganda, uzakomeza ubitegereze (ibiva hanze), dukomeze tugire ibyo bibazo tuvuga buri munsi, twitane ba mwa abashoramari bati ni Leta, Leta iti ni abikorera badutereranye,…”

Perezida yavuze ko Abanyarwanda bahinduye imyumvira, bigaherekezwa no guhindura imikorere, ibintu byakoroha.

Ati “Iki kintu cyo guhindura imyumvire mugerageze tucyumve neza kandi tugishyigikire.”

Aha yavuze ko bitari bikwiye kuba abantu batsimbarara ku myambaro, inkweto n’ibindi byakoreshejwe bizwi nka ‘Caguwa’.

Ati “…imyenda bita Caguwa, ni uguhitamo, ni ukuvugango jya muri ziriya ‘Ndibata’ zaturutse mu ngo, mubyo abantu bambayeho hanyuma bagera ku yindi Noheri bakabishyira iruhande, bakavuga ngo ibyo ni iby’abatagira Noheri nziza (uhitemo).

Bimwe ntanavugira hano, umuntu atambara ngo atize undi, ikote ushobora kuryambara ariko hari ibindi…abantu badashobora kwambarana, ariko (bakabigura) ikinyuranyo kirimo ni uko gusa utazi uwayambaye naho ubundi arahari cyangwase barahari ni benshi.”

Perezida yanenze abantu usanga bagamije gusenya Politike igamije guca iyi myenda n’inkweto bya Caguwa, nyamara ngo Leta yarayishyizeho igamije ineza y’Abanyarwanda n’igihugu.

Kagame avuga ko Abanyarwanda n’Abanyafurika muri rusange badakwiye kubaho nk’abantu bihebye.

Ati “Ni nko kuvuga ko amajyambere yadusize, yaducitse tutazayageraho, ibintu ari uguhendahenda, ari ukugenda buhoro, ari ukwitonda cyangwase tugahitamo kwibanira n’ubukene, tukabwemera tukumva ko tugomba kubana akaramata, twibanire n’ubukene dukundane, ntabwo aribyo,…mu mutwe niho hagomba kubanza guhinduka ibikorwa bigakurikiraho.”

Muri iki kiganiro, Caritas Mukandasira, umuyobozi w’Intara y’Uburengerazuba yavuze ko kubera ibikorwa-remezo by’amashanyarazi, imihanda n’ibindi, ngo bafite imigambi yo kwagura ishoramari, kandi ngo ubu bongereye 15% ku mirimo iciriritse yari muri iyi ntara.

Mukandasira kandi yizeje Perezida ko nyuma y’impanuro yabahaye ubwo yaherukaga gusura Uturere twa Rubavu na Nyabihu, ngo bazigendeyeho ku buryo ubu abana bari barataye ishuri hafi ya bose bamaze kurisubiramo, kandi ngo barimo no guhangana n’ikibazo cy’Isuku, ndetse banahangana n’ibibazo byari byagaragaye muri gahunda ya VUP na Girinka.

Vénuste KAMANZI
UM– USEKE.RW