Abantu 35 000 bavuwe n’ibikorwa bya Army Week mu myaka 3

Benshi mu barokotse basigiwe ibikomere na Jenoside bitakize kuva muri Gicurasi 2012 kugeza ubu bagiye bavurwa ku buntu n’abaganga bo mu ngabo z’igihugu mu turere 27 bagezemo. Kuri uyu wa mbere Mata 2015 ubwo bari i Rubavu bavuye abantu bakabakaba 300. Theophile Ruberangeyo uyobora ikigega FARG yavuze ko kuva mu 2012 abamaze kuvurwa muri ibi bikorwa bagera ku bihumbi 35.

Uyu ngo ni umusanzu w’ingabo ku bufatanye n’ikigega gitera inkunga abarokotse Jenoside batishoboye,FARG, bagifite ibikomere ku mubiri basigiwe na Jenoside.

Eng.Theophile Ruberangeyo yavuze uyu munsi ko iyo aba barwayi bajya kuvuzwa hanze y’u Rwanda kubera uburwayi bafite Leta, biciye muri FARG, yari gutanga amafaranga agera kuri miliyari 20 ariko ubu ngo hatanzwe atarenze miliyoni 300 mu bikoresho, imiti, ingendo…

Bamwe mu barokotse bavuwe aha i Rubavu bavuga ko bashimira cyane ingabo z’u Rwanda ubwitange zagize mu kubarokora zikaba zinabukomeje mu kubavura ibikomere basigiwe na Jenoside.

Muri aba harimo abagore bakivurwa ingaruka zo gufatwa ku ngufu n’irindi hohoterwa rikabije rishingiye ku gitsina bakorewe n’ubu nyuma y’imyaka 20 ibikomere bikaba bakibana nabyo.

Aline Bariga umwe mu bavuwe n’ingabo kuri uyu wa gatatu uyu munsi yavuze ko atewe ishema n’ibyishimo n’ingabo zabarokoye zikaba ziri no kubavura ubu.

Ati “Tugiye kwinjira mu bihe byo kwibuka twishimye kubera ubuvuzi twakorewe.”

Gusa yagaragaje ikibazo cy’uko i Rubavu nta Pharmacy igurirwamo imiti mu gihe abarokotse bayandikiwe kwa muganga.

Yavuze ko hari n’ikibazo cy’uko abarokotse aribo biyishyirira amafaranga (ticket moderateur) bacibwa kwa muganga n’amafaranga bakwa igihe bagiye kubonana n’umuganga w’inzobere.

Kuri iki Dr Alvera Mukabaramba Umunyamabanga wa Leta muri Minisiteri y’Ubutegetsi bw’igihugu  yavuze ko mu gihe cya vuba ku bufatanye bwa MINALOC na FARG, bazasaba ko Pharmacy zatsindiye amasoko zegera abaturage mu turere twose kuko imiti y’indwara zikomeye yatumizwaga i Kigali.

Yavuze ko amafaranga acibwa abarwayi ugihe bavurwa n’ayo bacibwa babonana na muganga w’inzobere batazongera kuyacibwa ngo azajya yishyurwa na FARG.

Col Dr Ben Karenzi ukuriye ibi bikorwa yavuze ko ingabo z’u Rwanda ari imbaraga igihugu gifite mu kugera ku ntego gishaka kugeraho.

Avuga ko muri ibi bikorwa bazasuzuma indwara zose kandi bakazivura kandi ngo nk’ingabo bifuza ko nta muntu n’umwe uzasigara atavuwe.

Ati “Tugomba gukora ibi kuko umutekano wa mbere ni ubuzima bw’abantu.”

Patrick MAISHA
UM– USEKE.RW/Rubavu