Abahanzi batandatu umuziki umaze guha ubutaka

Nta mwuga udakiza kereka ukozwe nabi. Umuziki hambere ntacyo wamariraga abawukora ndetse mu mitwe y’abanyarwanda bamwe kuwishoramo ku mwana byari nko guta umuco. Ibigaragara none ni uko umuziki ubu ari umwuga, bamwe mu bahanzi bakomeye mu Rwanda usibye kuba ubatunze bamwe banavanyemo ubushobozi bwo kwigurira ubutaka abandi barubaka.

King James nta myaka 10 amaze amenyekanye muri muzika ariko ubu nibyo bimutunze. Yiguriye ikibanza ku Ruyenzi ndetse ubu acyujujemo inzu. Ubu kubera muzika ye ni Ambasaderi wa Airtel Rwanda.

Abahungu bo itsinda rya Dream Boys; Platini Nemeye na Mujyanama Claude uzwi nka TMC batangiye kumenyekana mu 2010, ubu umuziki ni umwuga ubatunze kuko ibyo bize muri Kaminuza bataratangira kubikoresha.

Aba basore bamaze kwitabira irushanwa rya PGGSS kuva ryatangira, bivugwa ko umwe afite ikibanza i Nyamata undi akakigira i Gahanga mu mu Karere ka Kicukiro.

Senderi International Hit ari mu bahanzi bamaze igihe muri muzika, yayitangiye itaratangira guha amaramuko abayikora, akarusho ke ni uko yayikomeje by’abagezweho ubu niyo imutunze, yitwa “HITI!!!” bivugwa ko nawe afite ikibanza mu Mujyi wa Kigali i Gikondo muri Kicukiro.

Jay Polly umuhanzi ubu bigaragara ko akunzwe cyane n’urubyiruko umuziki niwo umutunzi kurusha impano yindi afite y’ubugeni no gushushanya, uyu aherutse kwegukana miliyoni 24 za PGGSS, asanzwe ariko anifitiye ikibanza i Kagugu mu karere ka Gasabo, bivugwa ko yavanye muri muzika.

Mubandi bahanzi bivugwako biguriye ubutaka babivanye muri muzika bakora barimo Riderman, Knowless n’abandi.

Usibye kugura ubutaka no kubaka amazu, aba bahanzi basanzwe bafite ibindi bikorwa byo kwiteza imbere bakora bavanye umutahe wabyo muri muzika.

Umuziki muri iki gihe ni kimwe mu bitunze umubare utari muto w’abawukora n’abandi babeshejeho. Umaze kuba umwuga uramutse ukomeje gutezwa imbere wagirira akamaro birushijeho umuryango nyarwanda n’igihugu

Joel Rutaganda
UM– USEKE.RW