Kirehe: Kugezwaho amashanyarazi baari kwishyura mu byiciro none bari kubyishyuzwa

Mu murenge wa Mushikiri, mu karere ka Kirehe abaturage baravuga ko bari bababwiye ko bazagezwaho amashanyarazi ariko amafaranga y’ibikoresho bakagenda bayishyura buhoro buhoro none bari kwishyuzwa buri gikoresho bari kugezwaho nka mubazi (cash power) n’ibindi.

Aba baturage biganjemo abo mu tugari twa Bisagara na Rwayikona bavuga ko mbere y’uko hatangira imirimo yo kubagezaho umuriro w’amashanyarazi bari bababwiye ko nta gikoresho bazahita bishyuzwa.

Bababwira ko ibi bikorwa byo kugeza amashanyarazi mu ngo zabo bagombaga kuzajya babyishyura ku giciro cy’umuriro baguze hagakurwaho 1/2.

Gusa ngo ubu si ko bimeze kuko bari kwishyuzwa ibikoresho byose birimo mubazi (cash power) n’ibindi.

Mvuyekure Jean Mari Vianney ati “ Baratubwiye ngo tube dutegereje, tugiye kubona tubona Cash Power zitangiye kuza tubajije abazifite baratubwira bati bari gutanga amafaranga uwo muntu yari afite uwo bavuganaga kuri telephone akamubwira ayo aduca hanyuma tukayatanga.”

Mugenzi we witwa Uretsinama Jean Paul avuga ko ibi bihabanye na gahunda ya Leta yo kugeza amashanyarazi kuri buri wese kuko atari ko abantu bose bafite ubushobozi bwo guhita bishyura aya mafaranga bari kwishyuzwa.

Ati “ Nyakubahwa Perezida Paul Kagame yashatse ko Abanyarwanda bose babona umuriro agatadowa yagaciye mu Rwanda ariko ibi bintu byaratuyobeye baraduhohotera rwose.”

Bamwe mu batangiye gukoresha amashanyarazi bavuga iyo bagiye kugura umuriro babaha 1/2  nk’uko bari basezeranyijwe ubwo bababwiraga ko nta gikoresho bazahita bishyuzwa nyamara barabyishyuye, bakavuga ko bari kwishyura kabiri.

Ngiruwonsanga Yohani ati “ Dore ubu twatangiye kwishyura Cash Power, uragura umuriro bakaguha icyakabiri cy’uwo wishyuye, ndumva amafaranga twishyuye twari dukwiye kuyaheraho twishyura cash power.”

Gatsinzi Annanie uyobora umurenge wa Mushikiri avuga ko habayeho ikibazo cy’uko bimwe mu bikoresho byashize igikorwa cyo gukwirakwiza amashanyarazi kitararangira hanyuma bamwe mubahoze bakora ibiraka muri REG biyumvikanira n’abaturage bakajya babafasha kubaha umuriro.

Avuga ko ikigo cy’igihugu gishinzwe gusakaza ingufu REG nta ruhare kibifitemo. Ati “ Abaturage bo bazi ko ari kiriya kigo (REG) cyabibagurishije kikaba arinacyo icyaha kijyaho ariko sibyo.”

Avuga ko ibi byakozwe ku bushake bw’abaturage ndetse ko nawe ubwe inzu acumbitsemo yayitanzeho amafaranga kugira ngo abone umuriro nk’uko aba baturage nabo bayatanze gusa ngo abemeye gutegereza igihe REG izongera kuzanira ibikoresho bazabona umuriro hagendewe ku masezerano bahawe.

Elia BYUK– USENGE
UM– USEKE.RW