I Mahama, Malala Yousafzai yasabye abana b’impunzi kwiremamo ikizere

Mu ruzinduko yari arimo mu Rwanda, Malala Yousafzai kuri uyu wa kane yasuye impunzi z’Abarundi zo mu nkambi y’I Mahama mu karere ka Kirehe, abwira abana bari muri iyi nkambi ko bagomba kwigirira ikizere bakumva ko bafite ubushobozi bwo kugera ku byiza bifuza kuzageraho nubwo bwose bari mu buhungiro.

Uyu mwari w’imyaka 19 wo muri Pakistani, wanahawe igihembo cy’abaharaniye amahoro cyitiriwe Nobel, yabwiye abana bahunganye n’ababyeyi bari muri iyi nkambi ko badakwiye guheranwa n’agahinda ko kuvutswa uburenganzira bwo kuba mu gihugu cyabo.

Malala Yousafzai asuye impunzi z’Abarundi nyuma yo gusura impunzi zo muri Somalia zicumbikiwe mu nkambi ya Dadaab muri Kenya ari naho yizihirije isabukuru y’imyaka 19 yuzuje kuwa kabiri.

Uyu mwari warokotse urupfu ubwo yaraswaga n’AbaTaliban bamuziza guharanira uburezi ku bana b’abakobwa yavuze ko uruzinduko rwe rugamije gukorera ubuvugizi ku burezi bw’abana b’abakobwa b’impunzi bari muri ibi bihugu (Rwanda na Kenya).

Malala yabwiye abana b’abakobwa b’ikigero cye bari aha mu nkambi ko batagomba gutakaza ikizere kubera ubuzima bw’ubuhunzi babayemo, ababwira ko bagomba kwiyumvamo ko ejo habo ari heza.

Malala yabwiye aba bana ko amahirwe bari kubona yo kugezwaho uburezi batagomba kuyapfusha ubusabagomba kwiga bashyizeho umwete kuko ishuri arirwo rufunguzo rw’ejo heza habo, nubwo bwose ubu ari impunzi.

Uyu mukobwa yavuze ko abayoboye ibihugu na za Guverinoma bakwiye gushyira imbaraga mu burezi bw’abana kuko ari bwo buryo bwo kubaka igihugu gitekanye mu buryo burambye.

Ati “ Niba dushaka kurwanya iterabwoba no kubaka amahoro arambye ni ngombwa  ko ibihugu byose bishyira imbaraga mu burezi bw’abana.”

Minisitiri ushinzwe impunzi no gukumira Ibiza, Mukantabana Seraphine yavuze ko ari amahirwe akomeye kubona ummwana nk’uyu asura impunzi akamenya ibibazo zifite kuko bivamo ubuvugizi bwagira akamaro.

Ati “ Uyu munsi turavuga ngo dukeneye ibi, kugira ngo abana bige ariko hari igihe bitagera hose, uriya mwana w’umukobwa aho agera inzugi zose zirafungurwa tukaba twumva ko kuba yaje hano akamenya uko inkambi iteye akareba ibyiza twagezeho, akanareba n’ibibazo tugifite bikabasha kugera hose.”

Mukantabana avuga ko urugendo rwa Malala ari nko gutera ingabo mu bitugu Minisiteri y’Impunzi no gukumira Ibiza, kuko imbaraga zashyizwe mu guha uburezi abana bari muri iyi nkambi zigiye gushyigikirwa.

Umuyobozi w’Ishami ry’Umuryango w’Abibumbye ryita ku mpunzi (UNHCR) mu Rwanda, Azam Saber yavuze ko igikorwa cy’uyu mwari ari indashyikirwa kuko ubuvugizi asanzwe akorera ababayeho nabi butanga umusaruro, bityo ko bimwe mu bibazo by’impunzi z’i Mahama bishobora kubonerwa umuti.

Photos © C. Nduwayo/Umuseke

Callixte NDUWAYO
UM– USEKE.RW