Rayon Sports yihanije Amagaju FC iyatsinda 6-0

Nyamirambo – Kuri uyu wa gatatu mu mukino wo ku munsi wa 29 wa Shampiyona, Rayon Sports yakiriye Amagaju Fc iyazimanira ibitego 6-0, byashimangiye ubushobozi bwa Rayon Sports mu gusatira izamu.

Uyu mukino wabaye nijoro kugira ngo ubone abafana, wabaye nyuma y’ibibazo by’imishahara no kwivumbura kw’abakinnyi ba Rayon Sports byavuzwe mu ntangiro z’iki cyumweru ndetse hari n’impungenge ko umukino ushobora kutaba.

Uyu mukino wagaragayemo impinduka, umuzamu w’Amavubi Jean Luc Ndayishimiye  bita ‘Bakame’ akaba na Kapiteni wa Rayon nyuma yo kunengwa n’ubuyobozi bw’ikipe kubera ko yavuze mu itangazamakuru iby’ibibazo byabo ngo bikaba intandaro yo kugumuka kw’abakinnyi, ntiyabanje mu kibuga.

Mu mwanya wa Bakame wari ku ntebe y’abasimbura habanjemo Bashunga Abouba mu izamu rya Rayon Sports.

Myugariro James Tubane Visi kapiteni nawe ntiyabanje mu kibuga, byatumye umurundi Kwizera Pierro ariwe wari uyoboye abandi nka Kapiteni.

Umukino waje kuba kandi uhira Rayon Sports, kuko ku munota wa munani gusa, Irambona Eric wa Rayon yari afunguye amazamu.

Ku munota wa 29, nyuma yo gucenga ba myugariro babiri b’Amagaju FC, Djabel Manishimwe yatsinze icya cya kabiri.

Ku munota wa 41, myugariro Emmanuel Imanishimwe uzerekeza muri Kenya yazamukanye umupira ku ruhande rw’ibumoso, atanga ‘passe’ yaje guhura n’umukinnyi w’Amagaju Bizimana Lahmatulah, akoze ku mupira werekeza mu izamu umuzamu w’Amagaju Rukundo Protogene bita Tiger ntiyabasha kuwukuramo, Amagaju aba yitsinze igitego cya gatatu.

Igice cya mbere cyaje kurangira ari ibitego ari bitatu bya Rayon Sports ku busa bw’Amagaju, ariko bahushije n’andi mashirwe menshi.

Igice cya kabiri, cyatangiye nanone Rayon isatira cyane, ku munota wa 47 myugariro wa Rayon Sports Manzi Thierry yaje kwinjiza igitego cya kane.

Ku munota wa 63, Kwizera Pierro yahawe umupira na Davis Kasirye atsinda agitego abasifuzi baje kwanga kuko yari yaraririye.

Ku munota wa 68 rutahizamu Davis Kasirye atsinda igitego cya gatanu, naho ku munota wa 89 Nshuti Domonique Savio yinjiza ibindi bitego bitatu, umukino urangira ari ibitego 6-0.

Mu yindi mikino y’umunsi wa 26:
Police FC 2 – 0 AS Kigali 2-0,
Musanze 0 – 0  Rwamagan,
Bugesera 2 – 1 Muhanga,
APR 1 – 0 Marines,
Sunrise 1 – 1 Espoir,
Kiyovu 3 – 0 Gicumbi FC (mpaga)

Ngabo Roben
UM– USEKE.RW