Inkunga yose si iyo kwishimira, hari ugutabara agushinyagurira – Mukantabana

*Kuva muri 2013, ibiza bimaze guhitana abantu 286, abakomeretse ni 396,
* Itegeko rishya ku micungire y’ibiza riteganya ikigega cyo gutabara mu gihe cy’ibiza,
*Minisitiri avuga ko hari abirirwa barekereje ngo bajye kwaka inkunga zo gutanga ubutabazi, ariko babifitemo inyungu.

Mu kiganiro Minisiteri y’Imicungi y’Ibiza n’Impunzi yagiranye n’Abanyamakuru kuri uyu wa 03 Werurwe; igaragaza imiterere y’itegeko rigena imicungire y’Ibiza, Minisitiri Mukantabana Seraphine yavuze ko iri tegeko rizakuraho akajagari kagirwaga n’abifuzaga gutanga ubutabazi nyamara babifitemo inyungu zabo bwite.

Iri tegeko ryemejwe rikanatangira kubahirizwa muri Kanama 2015, rishyira Ibiza mu byiciro bine: icy’ibiza birenze ubushobozi bw’igihugu biri mu kiciro cya kane n’ibiri mu cyiciro cya mbere cy’ibiza biba byabereye mu Murenge bigomba gucungwa n’ubuyobozi bw’umurenge bufatanyije n’abafatanyabikorwa ariko hatitabajwe izindi nzego.

Iri tegeko rinagena uko hazajya hakwa hakanatangwa ubutabazi n’ubufasha mvamahanga ku bagizweho ingaruka n’ibiza nk’uko bikubiye mu ngingo ya 22 na 23 z’iri tegeko, zigaragaza ko Leta y’u Rwanda izajya yemera cyangwa ikanga ubwo butabazi mu gihe iryari ririho ryari rifunguye imiryango ku miryango mpuzamahanga yifuzaga gutanga ubwo butabazi.

Minisitiri Mukantabana Seraphine avuga ko iri tegeko riziye igihe kuko rizajya rigaragaza ubuziranenge bw’imfashanyo zizajya zitangwa n’uburyo zizajya zitangwa mu gihe hari abitwazaga gutanga ubutabazi n’ubufasha, ariko mu bikorwa byabo ntibigaragare.

Ati “…Rije kugira ngo tuzirinde n’akajagari, kuko akenshi abaterankunga iyo habaye Ibiza buri wese aba yumva ko yakwirukanka ngo aje gutabara, ariko burya inkunga yose ntabwo iba ije ari iyo kwishimira, hari ushobora kugutabara bikavamo no kugushinyagurira cyangwa ibindi.”

Agaragaza aka gashinyaguro kakorwaga na bamwe mu baterankunga, Minisitiri yifashishije ingero zitagaragaza byimbitse igihe ibikorwa nk’ibi byabereye n’aho byabereye.

Ati “…ugasanga rimwe na rimwe umuntu azanye igifurumba cy’imyenda aje gutabara abantu basigaye iheruheru badafite n’icyo bikinga, ugasanga azanye ibintu bimwe yari ari hafi gutwika, akaba yazana n’ibiryo bipfuye, imiti iri hafi kurangira, akirukanka ngo aje gutabara.”

Mukantabana wavugaga ko aka kajagari k’ubutabazi na ko ubwako gashobora gutera Ibiza, yavuze ko bamwe muri aba batabazi baba ari ba rusahuriramunduru kuko baba bakurikiranye inyungu zabo bwite bityo iri tegeko rikaba rije kubima icyuho.

Yifashishije ingero z’ibyabaye ubwo u Rwanda rwakiraga impunzi z’Abarundi, Minisitiri yagize ati “umwe akaza ati nzanye ibihumbi 500 ngiye gufasha, …nzanye iki ngiye gufasha, wareba ugasanga utabitwayemo neza muri ako kajagari hari umuntu uzuririra ku kibazo cyabaye ajye gukora ku mitima y’abagira neza bamuhe ibyitwa ko bigiye gufasha abo bantu ariko bitazabageraho.”

Uretse kugena ibigenderwaho mu gutanga ubufasha ku bagwiririwe n’ibiza, Iri tegeko rinagena ishyirwaho ry’ikigega cy’ingoboka kizajya kitabazwa mu gihe habayeho Ibiza.

Inzego za Leta n’iz’abikorera zitegetswe kwiteganyiriza ku biza

Agaragaza bimwe mu bikubiye muri iri tegeko; Jean Baptiste Nsengiyumva yavuze ko inzego zose, zaba iza Leta n’iz’abikorera zisabwe kwiteganyiriza ingengo y’imari izakoreshwa mu gukumira no kugabanya ubukana bw’ibiza bishobora kuzibasira.

Nsengiyumva yavuze ko nta rwego cyangwa ikigo gikwiye kwitwaza ngo nta bushobozi gifite bwo kugura ibikoresho byakwifashishwa nka Kizimyamoto.

Ati “…ibijyanye no gukumira no kurwanya ubukana, waba wigenga cyangwa Leta, itegeko rirakubwira ngo ugomba kubikora ku ngengo y’imari yawe.”

Ingingo ya 391 mu gitabo cy’amategeko ahana y’u Rwanda, igena ibihano ku bijyanye no kutubahiriza amabwiriza, kurwanya no gukumira Ibiza aho igaragaza ko utabyubahirije ashobora guhanishwa igifungo cyo kuva ku mwaka umwe kugeza kuri ibiri n’ihazabu kuva ku mafaranga y’u Rwanda bihumbi 500 kugera kuri Miliyoni imwe cyangwa kimwe muri ibi bihano.

Kuva mu mwaka wa 2013, Ibiza byatwaye ubuzima bw’abantu 286, naho 396 bakomerekejwe na byo ndetse n’ibindi byangirikiyemo birimo amatungo yahaburiye ubuzima, imyaka y’abaturage yangiritse n’ibikorwa remezo nk’imihanda n’amavuriro byangiritse.

Martin NIYONKURU
UM– USEKE.RW