Umurambo w’umugabo watowe muri ruhurura, biravugwa ko yishwe n’imvura ya nijoro

*Uyu mugabo ngo yari amaze icyumweru yihisha nyiri inzu, kuko yari yarabuze ubwishyu bw’ubukode,

*Kabiri Daniel wabonywe yapfuye, yari umusirikare wavuye ku rugerero, yari afite ubumuga bwo kugira akaguru kamwe,

*Hari umuntu wamubonye saa saba z’ijoro ataha agendera ku mbago ze.

Mu gitondo kuri uyu wa kane, kuri ruhurura yo kuri APADE hafi y’ishuri rikuru rya INILAK, hatowe umurambo w’umugabo witwa Kabirizi Daniel, bivugwa ko yishwe n’imvura yaraye iguye mu ijoro ryo ku wa gatatu.

Abaturage bamuzi, bavuga ko nta kibazo yari afitanye n’umugore we bari bafitanye umwana umwe, mu gihe umugore we yari afite abandi bana batandatu yabyaye ahandi.

Umutesi Claudine ni we wakodeshaga Kabirizi n’umugore we inzu, mu mudugudu wa Sovu, akagari ka Niboye mu murenge wa Niboye, avuga ko uwo mugabo yitwa Kabirizi Daniel ngo yari amaze icyumweru kimwe cyangwa bibiri ataba mu rugo, yaragiye.

Yagize ati “Namuhaye igihe ntarengwa cyo kwishyura inzu, hari hashize ukwezi n’iminsi, gusa umugore we yari yarasigaye mu nzu kandi nta kibazo twari dufitanye, yaba we n’umugabo we bikundiraga inzoga.”

Undi mugore uturanye na Kabirizi, uvuga ko yamubonye nijoro ahagana saa saba (1h00 a.m) cyangwa saa munani, mu kabari Sonatube aho yakundaga kunywera, gusa ngo ntiyabonye yinjiramo uretse kumubona agenda n’imbago ze.

Aime, umukuru w’urwego rwa DASSO wungirije mu kagari ka Kagina hatoraguwemo uwo murambo, avuga ko ari mu bamubonye bwa mbere, ahagana saa ine, akavuga ko ari amazi yamuzanye ko batazi neza aho yamukuye.

Umugore wa Kabiri, avuga ko amakuru y’urupfu rw’umugabo we yayabwiwe n’umuhungu waje kuri moto. Akomeza avuga ko bari bamaze icyumweru batabana mu rugo, gusa ngo ntibari baratandukanye, ahubwo ngo umugabo yangaga kugera mu maso ya nyiri inzu, kuko ngo yamubwiraga ngo amuvire mu nzu cyangwa yishyure, undi ntamwishyure, agahitamo kumucengacenga.

Ibyo kuba uyu muryango ubona ubushobozi bwo gushyingura uwo mugabo we, uyu mugore yagize ati “Ntabwo mbizi. Turamujyana mu mudugudu dutuyemo, ubwo nibo baza kugira icyo babivugaho.”

Hyacinthe Uwingabire, Umunyamabanga nshingwabikorwa w’akagari ka Kagina ahatowe uyu murambo, avuga ko bawubonye saa ine za mugitondo uzanywe n’amazi. Gusa ngo amahirwe ni uko umurambo wabonye benewo.

Yagize ati “Ikigaragara ntiyaraye mu rugo, amazi ashobora kuba yamufatanyije n’intege nke yari afite, ni impanuka isanzwe urebye.”

Yavuze ko abaturage be bazi neza ruhurura yo kuri APAD kuko bamaze igihe babana nayo, gusa ngo amazi ashobora kuba yakuye uyu mugabo ruguru akamumanura.

Iyo ruhurura yo kuri APADE, ituruka ruguru ku muhanda wa kaburimbo, bityo ikaba ihurirwamo n’amazi menshi ku buryo uwagira ibyago akagwamo mu mvura, kuhikura byamugora.

Kabirizi Daniel ngo yari umwe mu bavuye ku rugerero (Demob), afite ubumuga bwo kutagira akaguru kamwe, akaba atagiraga inzu ye bwite.

Muri iki gihe cy’imvura nyinshi, birakwiye ko abaturage bagira amakenga, aho imvura imusanze akaba yakugama adategereje ko iza kuba nyinshi.

Amafoto/HATANGIMANA/UM– USEKE

HATANGIMANA Ange Eric
UM– USEKE.RW