Rayon Sports itsinze umukino wayo wa mbere muri CECAFA2014

10 Kanama 2014 – Kuri iki cyumweru nijoro, Kambale Salita Gentil niwe uhaye intsinzi ikipe ya Rayon Sports ku bitego bibiri yatsinze kuri kimwe cy’ikipe ya Adama City yo muri Ethiopia mu mukino wa kabiri wo mu itsinda A.

Umukino ugitangira Adama yayoboye umukino nk’iminota 10 isatira cyane. Nyuma y’iminota 15 Rayon Sports ifata umukino irawuyobora, muri iki gice cya mbere Rayon Sports yakubise imipira ibiri ku giti cy’izamu, gusa igice cya mbere kirangira ari 0 – 0.

Mu gice cya kabiri umutoza Jean Francois Luscuito wa Rayon yinjijemo Kambale Salita Gentil avanyemo Uwambajimana Leon (bita Kawunga) ndetse haninjirmao Sekle Yao Zeco bavanye muri Togo.

Adama City yagaragaje guhererekanya neza cyane umupira ariko ntigere kenshi imbere y’izamu rya Rayon Sports, iyi kipe y’i Nyanza yo yahererekanyaga yihuta igana ku izamu.

Ku munota wa 57 kuri corner yari itewe na Nizigiyimana Karim Kambale Salita Gentil (wiswe kandi Pappy Kamanzi) yarekuye ishoti igitego cya mbere kiba kirabonetse.

Ntibyatinze cyane kuko ku munota wa 78 Salita yongeye kubona igitego cya kabiri ateresheje umutwe kuri ‘centré’ yari itewe na Nizigiyimana Karim bita Makenzi.

Ku munota wa 90 mbere y’uko umukino utangira, ikipe ya Adama City yabonye igitego cyatsinzwe na Debeshy ku burangare bw’ab’inyuma ba Rayon umukino urangira ari 2 – 1.

Ni umukino wa mbere mu itsinda A Rayon Sports itsinze nyuma yo kunganya (0 – 0) na Azam FC ku mukino wa ubanza muri iri tsinda kuwa gatanu ubwo iri rushanwa ryatangiraga.

Azam kuri iki cyumweru yari yabanje gukina na KMKM yo muri Zanzibari iyitsinda 4 – 0, ubu Azam niyo iyoboye iri tsinda igakurikirwa na Rayon Sports ifite nayo amanota ane (4) n’ibitego bibiri izigamye. Atlabara yo muri South Sudan muri iri tsinda nayo ifite inota rimwe iraza ku mwanya wa gatatu nyuma yo kunganya na KMKM ku mukino wa  mbere, KMKM ni iya kane iya gatanu muri iri tsinda ni Adama City yatinzwe ibitego bibiri kuri uyu mukino wa mbere.

Imikino yabaye none

Telecom (Djibouti) 2 – 1  KCCA (Uganda)

KMKM (Zanz) 0 – 4  Azam FC (Tanzania)

Adama city (Ethio) 1 – 2  Rayon Sports (Rwa)

Imikino iteganyijwe kuri uyu wa mbere:

Benadir vs El Merreikh 1.00pm

Gor Mahia vs Atletico 3.00pm

Vital’O vs Police FC 5.00pm

Yose irabera i Nyamirambo

Photos/ P Nkurunziza & Plaisir MUZOGEYE

Paul NKURUNZIZA
UM– USEKE.RW