Iwawa: Abari bateje ikibazo sosiyete batashye ari ibisubizo

Rutsiro – Urubyiruko rusaga 696 rw’abahoze barasaritswe n’ibiyobyabwenge no kuba mu muhanda rwari ikibazo ku muryango nyarwanda rwasoje amasomo yo kurusubiza ku murongo (rehabilitation) no kwiga imyuga, ubu bakaba bagarutse mu muryango nyarwanda ari ibisubizo nk’uko byemejwe n’umuyobozi w’ikigo ngororamuco cya Iwawa mu muhango wo kubaha impamyabumenyi kuri uyu wa 01 Kanama.

Nyuma y’amasomo y’umwaka, uru rubyiruko rwagaragaje ko rumaze gusubira ku murongo wo gutekereza imbere habo, babyeyerekana bagaragaza impungenge zabo mu kudahita babona ibikoresho by’ibanze n’aho bakorera nibagera hanze, kugirango bafate igihe bataye bihuta mu kwiteza imbere.

Hari mu muhango wa gatandatu wo guha impamyabumenyi abarangije aha Iwawa, ikigo ngororamuco kinigisha imyuga cyashyizweho mu 2010 ubu kimaze guhugura no kugorora urubyiruko rurenga 3 000 rw’ahatandukanye mu gihugu.

Bamwe mu rubyiruko barangije uyu mwaka baganiriye n’umunyamakuru w’Umuseke i Rubavu, bavuga ko bahindutse, nyuma y’igihe kinini babaswe n’ibiyobyabwenge, bavuga ko Iwawa hahinduye imitekerereze yabo ndetse bakaba baje mu muryango ari abantu bashya bashaka kwiteza imbere no kwihuta kubera igihe bataye ku mihanda no mu bikorwa bibi.

Gusa bagaragaje impungenge zo kutitabwaho iyo bageze hanze ngo bafashwe gutangira ubuzima bwo gushyira mu ngiro ubumenyi bavanye kuri iki kirwa cyo mu kiyaga cya Kivu giherereye mu karere ka Karongi.

Jean Philbert Nsengimana Ministre w’Urubyiruko n’ikoranabuhanga, amaze kumva zimwe mu mpungenge z’uru rubyiruko  yasabye abayobozi b’inzego zibanze gukora ibishoboka byose bagakurikirana aba barangije kuko aribo baza basanga mu turere bayobora.

Niyongabo Nicolas Umuhuzabikorwa w’ikigo ngororamuco giteza imbere imyuga cya Iwawa, yavuze ko hari amakoperative akora ubukorikori aba adashaka guha umwanya wo kwimenyereza (stage) abarangije Iwawa, asaba abayobozi bari aha kubakorera ubuvugizi bakabona aho bahera.

Uru rubyiruko ariko kandi rwagiriwe inama yo kwishyira hamwe kugirango narwo rufashwe gutangira imishinga no gushyira mu ngiro amasomo baherewe Iwawa.

Bamwe mu babyeyi bari aha bashimiye cyane uko iki kigo gisubiza aba bana ku murongo bakava mu ngeso mbi bagahinduka, ndetse bamwe basaba ko hashyirwaho ikigo nk’iki gikomeye cyo kugarura ku murongo (rehabilitation) abana b’abakobwa kuko nabo ngo hamaze kugaragra benshi bafite ingeso mbi zibangamiye umuryango nyarwanda.

Patrick MAISHA
UM– USEKE.RW/Rubavu