Zone 5: Umukino uhuza u Rwanda na Uganda urerekanwa muri Petit Stade

Umukino wa ½ w’igikombe gihuza ibihugu byo mu karere ka gatanu uhuza u Rwanda na Uganda urabera i Cairo mu Misiri kuri uyu wa gatanu saa 19h. Abanyarwanda bifuza kureba uyu mukino boroherejwe, kuko urerekanwa kuri ‘Big screen’ ya petit stade i Remera.

Ikipe y’igihugu y’u Rwanda yabonye itike ya ½ kuko yarangije ari iya kabiri mu itsinda inyuma ya Misiri. Ikipe ya Moise Mutokambali igomba guhangana na Uganda yarangije ari iyambere mu itsinda ‘B’.

Ikipe ya Uganda bita Silver backs irahura n’u Rwanda ku nshuro ya kabiri yikurikiranya muri ½ kuko muri Zone 5 iheruka 2015 yasezereye u Rwanda bituma rubura itike ya AFRO BASKET2015.

Moise Mutokambali utoza u Rwanda yabwiye Umuseke ko ashaka gusiba aya mateka. Yagize ati:

“Turifuza kwihimura. Abagande bari mu itsinda ryoroshye. Kwiga umukino wabo byaratugoye kuko bakinnye n’amakipe yoroshye mu itsinda. Gusa dufite amahirwe ko dufite abakinnyi bazi neza Uganda. Ni ikipe dusanzwe dukina kandi tumenyereye. Turi gushyira hamwe kuko tuzi intego yacu. Turashaka kujya muri AfroBasket2017, kandi Uganda niyo igomba kuduha itike.”

Uyu mukino ubera muri Cairo International Stadium saa 19h, urerekanwa kuri ‘ecran geant’ yo muri petit stade. Kwinjira ni ubuntu.

Roben NGABO
UM– USEKE.RW