Zimbabwe: Leta yafashe umwanzuro wo guhagarika imirimo 25 000

Minisitiri w’Imari n’Igenamigambi muri Zimbabwe, yatangaje ko Leta igiye kuvanaho imirimo 25 000 yari isanzwe iriho mu kazi ka Leta kubera ko nta bushobozi buhari bwo guhemba abayikoragamo nk’uko bitangazwa n’ikinyamakuru cyegemiye kuri Leta Herald Newspaper.

Patrick Chinamasa, Minisitiri w’Imari muri iki gihugu yabwiye abagize Inteko Nshingamategeko ko imishahara na bimwe mu byagenerwaga abakozi ba Leta bizagabanywa na tumwe mu duhimbaza mushyi twagenerwaga abakozi mu gihe cy’imyaka ibiri.

Abakozi benshi muri Zimbabwe muri Leta bahabwaga inyongezo ku mushahara ku munsi mukuru wa Noheli ibyo bakunze kwita “13th cheque”.

Izi mpinduka ngo zizagira ingaruka no ku badipolomate b’iki gihugu babaga hanze yacyo, ndetse ngo birashoboka ko hazagabanywa umubare wa za Ambasade.

Zimbabwe ikomerewe no kubona ingengo y’imari ihagije, abakozi ba Leta batinze kubona umushahara w’ukwezi harimo  n’Abapolisi n’Abasirikare.

Impamvu nyamukuru yo kubura kw’ingengo y’imari ngo ni uko igihugu kitari kubasha gusoresha imisoro ihagije yo guhemba abakozi bacyo.

The Herald kivuga ko imishahara y’abakozi ba Leta ingana na 97% by’imisoro Zimbabwe yakusanyije. Ingamba za Minisitiri w’Imari n’Igenamigambi, Chinamasa ngo zitezweho kugabanya ingano y’amafaranga yagendaga mu mishahara ho 60%.

Ubukungu bwa Zimbabwe uko bugenda burushaho kwifata nabi, byatumye abantu benshi bigabiza imihanda mu myigaragambyo basaba ko Perezida Robert Mugabe ava ku butegetsi.

BBC

UM– USEKE.RW