Uyu mwaka IPRC West ntizubakira abarokotse ahubwo izabahugura mu myuga

Mu myaka ibiri ishize abarezi; abayobozi n’abanyeshuri bo mu ishuli rikuru ryigisha  amasomo y’imyuga n’ubumenyingiro mu burengerazuba (IPRC WEST) bagiye bubakira abacitse ku icumu rya Jenoside batari bafite aho baba. Ubuyobozi bw’iri shuri buvuga ko muri uyu mwaka butazubakira abarokotse ahubwo ko hari abazahugurwa mu myuga kugira ngo biteze imbere.

Eng. Mutangana  Frederic uyobora iri shuri avuga ko ryiyemeje gufasha abacitse ku icumu rya Jenoside batishoboye gusa ko muri uyu mwaka bahinduye ibyo bakunze gushyiramo imbaraga mu kubafasha.

Ati “ Buri mwaka uko twibutse hari igikorwa tuba tugomba gukorera  abacitse ku icumu kugira ngo  barusheho kwiyubaka, ubu twahisemo gufatanya n’akarere bakadushakira  abantu   29 cyangwa 30  hanyuma tukabigisha Imyuga ikabafasha  kugira  ubuzima bwiza bw’ejo hazaza.”

Uyu muyobozi wa IPRC West avuga ko aba bazahugura bazakomeza kubakurikirana ku buryo bazafashwa no kubona akazi.

Avuga ko guhitamo iki gikorwa byavuye mu bushishozi bw’ubuyobozi bw’iri shuri.

Ati “ Ni ikintu twatekereje dusanga  ari ingirakamaro, ntushobora kubura akazi warize umwuga  urumva  nitubigisha umwuga bazagenda nabo batume  imiryango yabo igira ubuzima bwiza.”

Ubwo hibukwakaga Jenoside yakorewe Abatutsi ku nshuro ya 21 muri 2015, iri shuri ryubakiye uwacitse ku icumu inzu ifite agaciro ka miliyoni 20 Frw. Mu mwaka ushize, iri shuri ryari rysaniye inzu undi muntu wacitse ku icumu.

Ubuyobozi bw’iri shuri buvuga ko kuwa  27 Mata hateganyijwe igikorwa cyo kwibuka ku rwego rw’iri shuri. Bukavuga ko buri mwaka iri shuri rizakomeza kwifatanya n’abarokotse mu bikorwa byo gufasha abatishoboye.

Sylvain  NGOBOKA
UM– USEKE.RW/KARONGI