Uwatozaga Academy ya APR ashobora kugirwa umutoza mukuru

Emmanuel Rubona ashobora kugirwa umutoza mukuru wa APR FC agasimbura abatoza Dule Dusan na Vincent Mashami baherutse kuva muri iyi kipe y’ingabo. Rubona yari asanzwe ari umutoza wa Academy y’abato ya APR FC.

Amakuru agera k’Umuseke aravuga ko uyu mutoza Rubona aza kuba agizwe umutoza mukuru w’agateganyo mu gihe ikipe igishakisha undi wo ku rwisumbuyeho.

Umuseke ubajije Adolph Kalisa umunyabanga mukuru wa APR FC yavuze ko adafite umwanya wo kuvuga kuri iki kibazo.

Dusan Dule wari umutoza mukuru yavuye muri APR mu mpera z’icyumweru gishize, adasezeye, yisubirira iwabo.

Usibye Dusan Dule wagiye na Vincent Mashami wari umwungirije nawe yerekeje gutoza mu ikipe y’igihugu akungiriza Johnny Mackinstry ariko noneho atabifatanya no kungiriza muri APR FC. Nubwo avuga ko bitararangira neza.

Vincent Mashami yabwiye Umuseke ko ubuyobozi ku mpande zombi APR FC na MINISPOC bari kumvikana.

Ati “Umwanzuro uvamo njye nzawukurikiza nta kibazo. Nshobora kuva muri APR FC nibyo. Gusa ntibirarangira neza.”

UM– USEKE.RW