Uretse Knowless, na Christopher ashobora kutazasubira muri PGGSS

Ku nshuro ya kabiri Muneza Christopher yitabira irushanwa rya Primus Guma Guma Super Star, ngo bishoboka ko atazongera kwitabira iri rushanwa ukundi. Ni nyuma y’uko umuhanzikazi Knowless asezereye iri rushanwa mu gihe yari mu bahanzi bari bafite amahirwe yo kuba baryegukana ku nshuro ya 4 ribaye akarivamo riri hafi gutangira.

Ibi byatangiye kuvugwa cyane na bamwe mu bakurikiranira uyu muhanzi bya hafi nyuma y’uko atagaragariye mu bahanzi batatu bafite amahirwe yo kuba bakwegukana iri rushanwa.

Biravugwa ko ariyo ntandaro yo kutazongera kwitabira iri rushanwa. Si Christopher gusa ushobora kutazitabira iri rushanwa nirikomeza kuko hari abandi bahanzi benshi batashatse ko amazina avugwa nabo bavuga ko batazagaruka.

Ese n’iki cyaba kiri inyuma y’uku kwanga kwitabira iri rushanwa rya PGGSS ku bahanzi?

Imwe mu mpamvu zagiye zigaragazwa n’abahanzi bamwe ngo ni imihindukire y’amategeko y’iri rushanwa.

Amarushanwa yabanjirije iri harebwaga umuhanzi ukunzwe cyane kurusha abandi, kuva ku nshuro ya gatatu n’iya kane biza gusa n’ibihindutse hazamo amabwiriza mashya yatumye irushanwa rigaragaramo amaraso mashya y’abahanzi bafite impano yo kuririmba Live kurusha abahanzi bafite abakunzi benshi.

Biza gutangazwa ko abakemurampaka bafite 80% naho 20% bikaba amajwi y’abakunzi b’umuhanzi.

Kuba ufite abafana benshi biguha amajwi 50%, uko uririmba bikaguha 30%, uko witwaye ku rubyiniro “stage bikaguha 10%, ikinyabupfura Discipline 10%.

Mu kiganiro na Mushyoma Joseph umuyobozi wa East African Promotors ‘EAP’, yatangarije Umuseke ko abahanzi bose bagerageje gusobanurirwa amategeko agenga iri rushanwa. Ko rero nta muhanzi wakabaye agira icyo yitwaza.

Ku ruhande rwa Christopher avuga ko ibyo byo kuba atazagaruka muri Guma Guma atazi aho biva, gusa ko biramutse aribyo yabitangaza. Ibirimo kuvugwa ubu ngo ntazi n’aho ababivuga babikura.

Joel Rutaganda
ububiko.umusekehost.com