Umuyobozi Mushya wa HEC azanye ingamba nshya zo kwita ku ireme ry’uburezi

Umuyobozi mushya w’Inama Nkuru y’Uburezi (HEC), Dr Muvunyi Emmanuel yavuze ko icyo ashyize imbere ari ukugenzura ireme ritangwa muri Kaminuza n’Amashuri Makuru, by’umwihariko gukurikirana amashuri makuru ashingwa, uko agenda akura n’ireme ry’uburezi hakagenzurwa ko bijyana.

Umuhango wo guhererekanya ububasha wabaye mu gitondo kuri uyu wa gatanu kuri Minisiteri y’Uburezi, aho Dr Sebasaza Mugisha Innocent wayoboraga Inama Nkuru y’Uburezi yahereje Dr Muvunyi Emmanuel ububasha imbere ya Minisitiri w’Uburezi, Dr Papias Musafiri Malimba na Perezida w’Inama y’Ubutegetsi ya HEC, Dr Gahakwa Daphrose.

Mu kiganiro kigufi yahaye abanyamakuru Umuyobozi w’Inama Nkuru y’Uburezi mushya, yavuze ko hagiye gushyirwa imbaraga mu kugenzura amashuri atangira mu Rwanda, cyane hakarebwa ko agiye kwigisha ikoranabuhanga n’andi masomo igihugu gishaka kubakiraho ubukungu.

Yagize ati “Igihugu cyacu, icyerekezo cyihaye gishingiye ku kugira ubukungu bushingiye ku bumenyi n’ikoranabuhanga, niho cyane cyane tuzarebera, cyane n’abatangira amashuri cyangwa abatangira progaramu mu mashuri yari asanzwe, ko bakwibanda cyane ku gutanga ubumenyi bujyanye n’icyerekezo igihugu cyihaye, ndetse bakabutanga mu buryo bushya budasanzwe, kugira ngo Abanyarwanda bari muri ayo mashuri makuru barusheho kugera kuri ubwo bumenyi.”

Dr Muvunyi yavuze ko mu ngamba nshya zo kwita ku ireme ry’uburezi harimo kugendana n’amashuri ashingwa kuva atangiye no kugera ubwo yagura ibikorwa byayo, bikajyana n’ireme ry’uburezi ritangwa aho kugira ngo azafungwe nyuma.

Ati “Mu gihe ishuri ritangira hari ibisabwa by’ibanze, nko kuvuga ngo mugomba gutangirana abanyeshuri bangana gutya, abarimu bangana gutya, rigomba gutangirana n’ibikoresho bingana gutya, Labo igomba kuba ingana gutya ifite ibikoresho ibi n’ibi, ibi ni iby’ibanze, ariko iyo ishuri ritangira rirakura, ryongera umubare w’abanyeshuri barigana, ryongera ibikoresho, icyo gihe ‘standard norms’ (ireme ry’uburezi) bisaba ko uko bagenda biyongera banongera ibyangombwa, umubare w’abarimu ugomba kwiyongera, umubare wa Labo ugomba kwiyongera, n’ubunini bw’amazu n’amasomero bigomba kwiyongera, icyo gihe rero ntituzareka ikigo gitangira gusa ngo tuzasubireyo nyuma kureba, nyuma y’umwaka cyangwa imyaka ingahe, tuzagerageza kubana na cyo muri urwo rugendo mu gihe gitera imbere, kigenda kizamuka, ibyo tuzabishyiramo imbaraga kugira ngo tutazagera ahantu duhagarika ikigo ahubwo tugifashe kugenda cyubahiriza ibisabwa.”

Ku kuba haba hari ibibazo asanze muri HEC, Dr Muvunyi yavuze ko ibibazo by’uburezi bikemurwa gahoro gahoro, ariko ngo hari intambwe yatewe ndende harimo n’isuzuma ryimbitse ryakozwe mu mashuri makuru, rigasiga agera ku 10 amwe ahagarikiwe amashami amwe n’amwe andi agafungwa by’agateganyo bitewe no kutuzuza ireme ry’uburezi.

Ati “Kuba amashuri amwe yarafunzwe si igikuba cyacitse, ni ibintu bisanzwe no mu kindi gihugu. Kuba amashuri amwe yarafunzwe cyangwa progaramu zigahagarikwa ni ibintu bibaho, bishoboka cyane cyane mu gihugu gifite umurongo, kandi gifite icyerekezo cyo guteza imbere ireme ry’uburezi mu mashuri makuru.

Ntabwo nshaka ko byumvikana ko ari abanyeshuri bigaga muri izo progaramu cyangwa muri ibyo bigo, kumva ko ari igikuba cyacitse, babirebe mu buryo bwiza kuko turashaka kwereka abanyeshuri ko kuba progaramu zaragaragaye ko zidakwiye, uburyo zitangwa butuzuye, ahubwo babyishimire, bivuze ko mbere bahabwaga ireme ry’uburezi rituzuye, ni nk’uko wajya guhaha ikintu rukana ugatanga amafaranga yuzuye bakaguha ikintu kituzuye, niba ugiye kugura Kg 1 bakaguha amagarama kandi utanze amafaranga ya Kg 1.

Niba abanyeshuri batangaga amafaranga kugira ngo babone ubumenyi ariko bikaba bigaragaye ko bahabwaga ubumenyi butuzuye, ni byiza bumve ko tugomba kugira icyo dukora n’ibyo bigo. Bishobora gufata igihe gito nangwa bishobora kubabangamira ko bahagarikwa kwiga wenda bakazasubiramo nyuma ikigo cyujuje ibisabwa, cyangwa bakiga ahandi ariko ibyo babibone ko ari ibintu byiza bingana n’ikiguzi baba batanga.”

Kimwe mu byihutirwa uru rwego HEC rugomba gukemura, harimo n’iki kibazo cy’amwe mu mashuri makuru yigenga yahagarikiwe progaramu andi agafungwa by’agateganyo, Dr Muvunyi Emmanuel yavuze ko ibimaze gukorwa ari byisnhi ku buryo hari umurongo mwiza wo kukirangiza.

Minisitiri w’Uburezi Dr Papias Malimba yavuze ko Dr Muvunyi Emmanuel atari mushya mu burezi, ko amaraso azanye yubatse ubudahangarwa, akwiye kuyakoresha yubaka ‘Legacy’ (umurage w’icyo abandi bazamwibukiraho).

Yavuze ko umusaruro utangwa n’amashuri mashya ashingwa utapfa kugaragara hatabayeho kuyakorera igenzura, asaba ko HEC yanoza ibitaranozwa mu mategeko byaba bihari, ariko amabwiriza y’ireme ry’uburezi agiyeho akubahirizwa.

Kuri Dr Daphrose Gahakwa ukuriye Inama y’Ubutegetsi ya HEC, ngo Dr Muvunyi Emmanuel yagize amahirwe kuko asanze muri HEC harabaye umurongo uhamye (Base Line) azaheraho yubaka ibyo agiye gukora, aha yavugaga igenzura ryimbitswe ryakozwe bwa mbere mu Rwanda rireba ireme ry’uburezi ritangwa muri Kaminuza n’amashuri makuru cyane ayigenga.

Dr Muvunyi Emmanuel si mushya mu burezi kuko yigeze kuba ayobora Ikigo cyari gishinzwe gutanga inguzanyo ku banyeshuri biga muri Kaminuza n’Amashuri makuru, SFAR.

HATANGIMANA Ange Eric
UM– USEKE.RW