Ngo niwe muhanzi wa mbere wa Hiphop muri Kimironko

Umuhanzi ukizamuka uzwi ku izina rya Cici Double Voice wiyita kandi “umutagatifu wa Kimirongo” yabwiye Umuseke ko ari we muririmbyi wa mbere mu gace ka Kimironko uririmba injyana ya Hip Hop.

Rugambwa Innocent, ntabwo azwi cyane mu bahanzi ba HipHop mu Rwanda, ku myaka 24 yemeza ko ahereye Kimironko, aho avuga ko ariwe wa mbere uririmba HipHop ngo azakomeza kugeza arushije abandi gukora neza iyi njyana mu Rwanda.

“Ninjye mutagatifu wa Kimironko,  ninjye wemeza mu njyana ya hip hop kuko njye ndirimba ukuri mu njyana yanjye kandi niko mba ngamije kwimika” Cici Double Voice.

Tumubajije icyo ashingiraho avuga ko ari we wa mbere mu njyana ya Hip Hp aho Kimironko atuye, ati:”nanjye mbyumva mu bantu babivuga.”

Nubwo ngo ataragira izina rikomeye muri muzika, avuga ko uyu mwaka mushya yatangiye gukora cyane muzika ye, kwandika no gutunganya ‘imirongo’ ye, kugirango akomeze izina rye mu Rwanda nawe.

Abahanzi mu Rwanda bamaze kuba benshi cyane kandi bose usanga bifitemo ikizere cyo gutungwa na muzika bakora. Uyu ni umwe muri bo uvuga ko uyu mwaka azakora cyane ibihangano kandi byiza ngo bigire aho bimugeza.

Uyu musore ari gukorera muzika ye muri Studio ya True Friends Record aratangaza ko yamaze gushyira indirimbo ya mbere hanze yakoranye n’umuhanzi Black Disciple yitwa “nk’Umunyarwanda” iyindi izaza muri Gashyantare yitwa “Nyita ukundi” ari kumwe na Clovis.

Guhera mu myaka igera ku 10 ishize, umuziki ni kimwe mu bintu bishishikaje urubyiruko rwa none cyane ko benshi bamaze kubona ko harimo amaramuko no kwamamara.

JD Nsengiyumva Inzaghi
ububiko.umusekehost.com