Umuhanga muri ‘Computer’ yahanuye ko Yezu azagaruka mu mpera z’uku Kwezi

Umukobwa w’umuhanga mu gukora ‘programs’ za Mudasobwa akaba n’Umukirisitu, Nora Roth avuga ko yifashishije mudasobwa ye yakoze imibare asanga Yesu Kristu azagaruka mu mpera z’Ukuboza uyu mwaka.

Ngo Yesu nagaruka azasiga Isi idashobora kongera guturwa mu myaka nibura 1000. Uriya muhanga yavuze ko mu myaka 1000 ngo isi izaba iruhutse akajagari k’abantu.

Uyu mukobwa yemera ko  mudasobwa ye yamweretse ko isi izaba iruhutse ibyaha by’abantu bamaze imyaka irenga 3000 barayiyogoje.

Ngo mu mpera z’uku kwezi k’Ukuboza, Yesu azaza ajyane abantu be mu ijuru bajye kuruhuka babeho neza.

Imibare ya Roth ngo ishingiye ku buhanuzi bwa Daniel buboneka muri Bibiliya aho bavuga ukuntu abo Bibiliya yita ‘ubwoko bw’Imana’ bashyizwe mu bubata bw’ubutegetsi bwa Babuloni.

Ngo muri kiriya gitabo hari aho Bibiliya ivuga ko nyuma y’imyaka 77, Malayika Gabuliyeli avuga ukuntu ubwoko bw’Imana buzavanwa mu bucakara bwa Babuloni.

Roth yemeza ko imibare karindwi yerekana ikindi cyuzuye, cyangwa Yubile (ni ukuvuga igihe nyacyo gifatika).

Ubusanzwe ngo Bibiliya yemeza ko abantu bagomba gukora iminsi itandatu uwa karindwi bakaruhuka, uyu munsi bamwe bakawita ku Cyumweru.

Ngo Imana kandi yasabye Abisiraheli kujya bahinga mu gihe cy’imyaka itandatu ariko uwa karindwi bakareka ikera, bagasarura ariko ntibasarure ngo bamaremo imyaka ahubwo bakareka ikarara bityo n’abakene bakabasha kujya gutora imyaka yasigaye mu mirima.

Roth yemeza ko Yubile y’imyaka ivugwa muri Bibiliya yatangiye mu mwaka wa 1 416 mbere ya Yesu icyo gihe ngo nibwo Imana yasabye abantu bayo kwinjira i Kanani.

Iyi Yubile ngo izarangirana n’uku kwezi k’Ukuboza uyu mwaka ni ukuvuga ko hazaba hashize imyaka 3 431.

Ku rundi ruhande ariko umuhanga witwa Nigel Watson yavuze ko ibyo Roth n’abandi bavuga ‘ari amagambo gusa’ yo gutera abantu ubwoba cyangwa kugira ngo bavugwe mu bitangazamakuru.

Ngo baba bashaka kwerekana ko bazi ibyo Imana itekereza cyangwa bikaba ari uburyo bwo kwerekana ko bahangayikishwijwe n’ibibera mu isi.

Muri Nyakanga uyu mwaka hasohotse video kuri YouTube yerekana ukuntu Isi yari burangirane na kuriya kwezi bitewe n’uko hari ibigize inda y’isi yo mu majyaruguru byari bwivumbagatanye bigateza ikibazo gikomeye cyari busenye isi.

Daily Mail

Jean Pierre NIZEYIMANA
UM– USEKE.RW