Uganda: Umuyobozi wa Polisi, Gen Kale Kayihura ntakiburanishijwe mu nkiko

Minisitiri w’Umutekano w’Imbere mu gihugu muri Uganda, yemeje ko Kale Kayihura, Umuyobozi wa Polisi atazakurikiranwa mu nkiko nyuma yo kwanga kwitaba urukiko kubera ibyaha Polisi ayoboye iregwa byo guhutaza abatavuga rumwe na Leta.

Mu kiganiro n’abanyamakuru i Kampala, Aboubakar Jeje Odongo yavuze ko Umukuru wa Polisi atazakurikiranwa mu nkiko, nka we ubwe kubera ko ngo “ayobora urwego rugenwa n’itegeko nshinga”.

Odongo yavuze ko Umukuru wa Polisi ari urwego. Bityo ngo kumutandukanya n’urwego akaba we ku giti cye byaba atari byo.

Abacamanza bakurikirana imanza zijyana n’ihutazwa ry’uburenganzira bwa muntu bagera kuri 20, bamaze igihe bakurkirana dosiye irega Gen. Kayihura, nk’Umuyobozi wa Polisi ishinjwa guhutaza abayoboke ba Dr. Kizza Besigye utavuga rumwe na Perezida Yoweri Museveni.

Gen Kayihura ntiyigeze yitaba urukiko mu ntangiriro z’uku kwezi, yisobanuye avuga ko atabonye urupapuro rumuhamagaza.

Kayihura kandi ntiyitabye Akanama k’Inteko Nshingamategeko kashinzwe gukurikirana iki kibazo.

BBC

UM– USEKE.RW