Uganda Cranes iri kwiyongerera amahirwe yo kujya mu gikombe cy'isi

Imisambi ya Uganda ubu iyoboye  itsinda J ikaba ifite amahirwe menshi yo kujya mu gikombe cy’isi. Ni nyuma yo gutsinda Angola (palancas negras) ibitego 2 kuri 1 kuri Mandela Stadium i Kampala kuri uyu wa 15 Kamena 2013.

Igice cya mbere cy’umukino cyarangiye ari ubusa ku busa hagati y’amakipe yombi, ku munota wa 57 w’umukino Angola yabonye igitego gitsinzwe na Ricardo Estevas Job.

Ku munota wa 83 gusa rutahizamu wa Yanga Africans Emmanuel Okwi yaje kubona igitego cyo kwishyura umukino usubira irudubi ariko unagana ku musozo.

Tony Maweje uherutse no gutsinda Liberia mu mukino wa gicuti niwe winjije igitego cy’intsinzi ku munota wa 89 nyuma yaho myugariro wa Angola Fabricio Matuta  aherewe ikarita itukura ku munota wa 86.

Amakipe yombi yaje kurangiza umukino ari abakinnyi 10 kuko Hassan  Wasswa wa Uganda nawe yari yabonye ikarita itukura ku munota wa 62.

Uganda Cranes igomba gutegereza umukino ugomba guhuza Senegal na Gabon kuri iki cyumweru,  ubu bakaba bayoboye itsinda n’amanota 8 mugihe Senegal yo ifite amanota 6.

Kuri iki cyumweru, Amavubi y’u Rwanda akaza guhangana na Algeria biri mu itsinda rimwe.

JD Nsengiyumva Inzaghi
UM– USEKE.RW