Ubwiherero bujyanye n’igihe, ECO SUN bugira uruhare mu kubungabunga ibidukikije

Hirya no hino mu gihugu hagiye hubakwa imisarane ya Eco Sun yubakirwa hejuru y’ubutaka. Gukoresha iyi misarane ibituma imyanda ijyamo ibasha kubyazwa ifumbire ku bahinzi.

Imisarani ya Eco sun yubakwa hatagombye kubaho gucukura,  yubakwa  hejuru y’ubutaka. Imbere muri iyo misarani haba harimo ibice bibiri. Hari ahagenewe kujya umwanda woroshye ndetse n’ahajya umwanda ukomeye ibi birasobanurwa Karangwa Rambert uyobora ikigega gishinzwe gutera inkunga ibikorwa by’amazi isuku n’isukura.

Igihe icyumba kimwe cyuzuye,  Karangwa avuga ko gifungwa maze hagakoreshwa ikindi cyumba kijyamo imyanda ikomeye. Nyuma y’amezi 6 ya myanda ikomeye iba yaramaze kugira ubuziranenge ikaba yakoreshwa nk’ifumbire ku bahinzi.

Ushobora kuba uri kwibaza aho iyo myanda yoroshye ijya n’aho ikoreshwa! Karangwa Rambert arabisobanura muri aya magambo :

“Imyanda yoroshye cyangwa se inkari ihita itandukanywa n’imyanda ikomeye.  Aha bikorwa inkari zikusanyirizwa mu kigega cyangwa se ikijerekani, ikabikwa byibuze iminsi 45 iki gihe nta kintu ishobora gutwara ,ibi ntibibujije ko mu gihe cy’ihinga byihutirwa izi nkari zishobora gukoreshwa ariko habanje kwitondera ko zidashobora kubanduza. Aha bafata ijerekani imwe y’inkari bakayivanga n’ijerekani 4 z’amazi”

Hanyuma se imyanda ikomeye yo bigenda bite?n i ryari yakoreshwa?K arangwa Rambert arakomeza abidusobanurira:

“Iyo umuntu amaze kukoresha ubwo bwiherero,ashyiramo ivu kuko ari igikoresho gifasha kumisha no kwica udukoko twose dushobora kwivanga n’iyo myanda. N’uburyo ubwiherero bwa eco sun bwubatse harimo akadirishya kongeramo ubushyuhe bwica vuba vuba  iyo myanda.

Uyu muyobozi w’ikigega gishinzwe gutera inkunga ibikorwa by’amazi isuku n’isukura kandi avuga ko iyi myanda ishobora gukoreshwa mu gihe cy’amezi 6 ku hantu hariho ubukonje naho ku hantu hashyushye bifata amezi 3 gusa.

Tubabwire ko ubu bwiherero butangiza  ibidukikije, gusa ngo mu gukoresha ifumbire ituruka kuri iyi myanda bisaba kuba ubisobanukiwe. Ubu uyu mushinga ugena igikorwa cyo gukangurira abaturage imikoreshereze y’ifumbire ituruka kuri iyi myanda.

Claire u
Umuseke.com