Twasanze u Rwanda rwiteguye neza AU Summit – Dlamini-Zuma

Nyuma yo kwakirwa na Perezida wa Repubulika Paul Kagame, kuri uyu wa kane, Umuyobozi mukuru w’umuryango wa Afurika yunze ubumwe Dr. Nkosazana Dlamini-Zuma yavuze ko anejejwe n’aho u Rwanda rugeze rwitegura inama ya 27 y’umuryango wa Afurika yunze ubumwe.

Kuva mu matariki 10 kugera 18 z’ukwezi gutaha kwa Nyakanga, u Rwanda ruzakira inama ya 27 y’umuryango wa Afurika yunze ubumwe ‘African Union Summit’. Iyi nama izigtabirwa n’abakuru b’ibihugu na za Guverinoma baturutse hirya no hino muri Afurika.

Muri iki cyumweru, umuyobozi mukuru w’umuryango wa Afurika yunze Ubumwe Dr. Nkosazana Dlamini-Zuma ari nawo utegura inama yari mu Rwanda kugira ngo yirebere aho imyiteguro igeze, n’uko ibikorwaremezo bizakira abantu bihagaze..

Nyuma yo kubonana na Perezida Paul Kagame, Dr. Nkosazana yabwiye itangazamakuru ko kuwa gatatu w’iki cyumweru we n’ikipe bazanye basuye ibikorwaremezo byose bizakenerwa mu nama nka za Hoteli, ibyumba by’inama n’ibindi, kandi ngo bishimiye ko bazaza mu nama bakakirwa neza.

Yagize ati “Ibikorwaremezo bimeze neza, turishimye. Mu mpera z’ukwezi ikipe ya African Union izaza hano kugira ngo isuzume, igerageze (testing) ibintu byose irebe niba biteguye neza kandi bikora kugira ngo umunsi w’inama uzagere ibintu byose bikora neza.”

Dr. Nkosazana urimo usoza manda ye ku buyobozi bw’Umuryango wa Afurika yunze Ubumwe, yavuze ko mu nama yagiranye na Perezida baganiriye byinshi birebana n’inama. Akaba asubira ku kicaro cy’umuryango wa Afurika yunze ubumwe Addis Ababa, muri Ethiopa ku gicamunsi cyo kuri uyu wa kane.

Mu bikorwa byitezwe cyane muri iyi nama y’umuryango wa Afurika yunze ubumwe izabera mu Rwanda, harimo imurikwa ku mugaragaro rya Pasiporo Nyafurika (African passport) izatangira ikoreshwa n’abayobozi b’ibihugu n’ab’umuryango wa Afurika yunze ubumwe; Hitezwe kandi n’amatora y’umuyobozi w’umuryango wa Afurika yunze, umwanya Dr. Nkosazana amazeho imyaka ine.

Vénuste KAMANZI
UM– USEKE.RW