The Ben agiye kuzuza inzu i Nyamata

Mugisha Benjamin, uzwi muri muzika nyarwanda nka The Ben agiye kuzuza inzu ye ari kubaka mu Karere ka Bugesera mu Mujyi wa Nyamata. Kuri we ngo yahisemo aha mu rwego rwo gukomeza kuzamura imiturire y’aka karere.

The Ben yerekeje muri Leta Zunze Ubumwe z’Amerika mu mpera za 2009. Yari ajyanye na Meddy nawe wari umaze kugira izina rikomeye muri muzika bagiye kwitabira ibitaramo bari batumiwemo.

Kuva icyo gihe ntibagarutse ndetse havugwa byinshi kuri bo no kugaruka kwabo.

The Ben avuga ko nta muntu n’umwe ku isi utaravugwa nabi, uwaba ataravugwa ku bintu bibi ngo yaba ari nka malayika wavuye mu ijuru.

The Ben yabwiye Umuseke ko yatekereje gutangira kubaka inzu ye i Bugesera mu rwego rwo kwiteza imbere ubwo no guteza imbere imyubakire muri aka karere.

Ati “Natangiye kubaka i Nyamata ngo nanjye nkomeze kwagura umujyi wa Nyamata no kugaragaza ubwiza bw’ako Karere. Kera abantu benshi bumvaga ngo atari ahantu ho guturwa.

Njye nasanze ahantu umunyarwanda wese ashobora kwifuza gutura. Hamaze no gutera imbere cyane kubera ibikorwa bigenda bihakorerwa”.

The Ben avuga narangiza amasomo arimo muri Leta Zunze Ubumwe z’Amerika, agomba kugaruka gukorera mu Rwanda n’ibikorwa bye bikarushaho guteza igihugu imbere.

Abajijwe ku bitaramo byagiye bivugwa ko ashobora kuzaza kubikorera mu Rwanda ndetse na mugenzi we Meddy, yavuze ko bidahindutse uyu mwaka wa 2015 utazarangira bataje gutaramana n’abanyarwanda.

The Ben avuga kandi ko yifatanyije na buri munyarwanda wese kwibuka inshuti, abavandimwe, ababyeyi bazize uko baremwe muri iki gihe u Rwanda rugiye kwinjiramo cyo kwibuka ku nshuro ya 21 Jenoside yakorewe Abatutsi.

Avuga ko iki ari igihe cyo kurushaho gutekereza ejo hazaza heza ku banyarwanda bose banirinda ikintu cyose cyatuma u Rwanda rwongera kwisanga ahantu habi.

Joel Rutaganda & Iras Jalas

UM– USEKE.RW