Somalia: Ba rushimusi barekuye bwa bwato nta ngurane bahawe

Abayobozi bo muri Somalia batangaje ko ubwato burimo amavuta ya essence bwari bwarafashwe na ba rushimusi bwaraye burekuwe. Ngo baburekuye nta ndishyi itanzwe nk’uko aba barushimusi babyifuzaga.

Bitangajwe nyuma y’uko habaye kurasana hagati y’ingabo zicunga umutekano mu mazi hamwe n’abantu bataramenyekana bivugwa ko bari bagemuriye bariya ba rushimusi.

Ibigega birimo amavuta ashyirwa mu binyabiziga byafatiwe mu bwato mu Nyanja y’Abahinde ku wa Mbere w’iki Cyumweru ubwo byavaga muri Djibouti bigana Mogadishu muri Somalia nk’uko bivugwa na Reuters.

Uku gushimuta ubwato gutya by byaherukaga muri 2012.

Umukuru wa Police mu gace ka Puntland  Abdirahman Mohamud Hassan yagize ati: “Nyuma yo kurasana nabo, twahise tujya mu biganiro tugira ibyo twemeranywaho nyuma abapolisi bacu basubira mu birindiro byabo abandi nabo baragenda.”

Umwe muri ba rushimusi yabwiye Reuters ko barekuye buriya bwato nta ngurane bahawe.

Muri uko kurasana ngo hari abantu bane bakomeretse ariko ntiharamenyekana abapfuye uko bangana.

Ubu bwato bari bafashe busanzwe ari ubwo muri Leta zunze ubumwe z’Abarabu.

Jean Pierre NIZEYIMANA
UM– USEKE.RW