SFH yanenze abanyamakuru kudashishikazwa n’inkuru z’ubuzima

Umuryango witwa ‘Society for Family Health (SFH), wita ku by’ubuzima waneze abantu bacuruza udukingirizo ariko bakaba batadushyira ahagaragara bigatuma abaturage batagira imyumvire yo kudukoresha bikongera ubwandu bwa SIDA, ngo itangazamakuru rigomba gukora inkuru z’ubuzima zicukumbura ibibazo bihari.

Mu kiganiro uyu muryango SFH watanze mu mahugurwa y’abanyamakuru ku wa gatatu tariki 7 Ukwakira 2015, wavuze ko inkuru z’ubuzima ziba zikenewe n’abaturage benshi.

Ikibazo cyo kudakoresha agakingirizo, abayobozi ba SFH bavuze ko abacuruzi b’udukingirizo batajya badushyira ahagaragara mu maduka, byakubitiraho n’uko abaturage batinya gusaba utwo dukingirizo, bigatuma abantu barushaho gukora imibonano mpuzabitsina idakingiye.

Ibi ngo byakabaye zimwe mu nkuru abanyamakuru bakwiye gukora bigafasha igihugu kubungabunga ubuzima bw’Abanyarwanda.

Ntaganira Cyrus ushinzwe ibikorwa by’ubucuruzi muri SFH yagize ati “Ibura ry’udukingirizo rishobora guterwa n’uko abaducuruza batadushyira ahagaragara.”

Umuyobozi wa SFH, Manasseh Gihana Wandera, asaba abanyamakuru gucukumbura inkuru nk’izi zirebana n’ubuzima bakazigeza ku baturage.

Yagize ati “Hari ikigero cy’imyumvire abaturage batarageraho mu bijyanye no kuboneza urubyaro, kwirinda icyorezo cya SIDA, Malaria n’izindi ndwara, turasaba itangazamakuru gucukumbura inkuru zijyanye n’ubuzima.”

Umunyamabanga Nshingwabikorwa w’Inama Nkuru y’itangazamakuru, Peacemaker Mbungiramihigo, na we yashimangiye ko abona itangazamakuru rikwiriye kuva muri politiki, rikavuga no ku buzima.

Ku rundi ruhande, abanyamakuru bavuze ko hakiri aho inzego z’ubuzima zitaborohereza kubona amakuru, ngo zitwaje ingingo z’itegeko ribasaba kugirira ibanga umurwayi.

Society for Family Health uravuga ko nubwo wageze ku ntego yawo muri uyu mwaka, yo gutanga udukingirizo tugera kuri miliyoni 16, ngo hakiri benshi badukeneye.

Uyu muryango uterwa inkunga na Leta Zunze Ubumwe za Amerika, ukora ubukangurambaga ukanatanga ibyangombwa byo kwita ku buzima n’isuku n’isukura, wumvikanye na Leta y’u Rwanda uburyo bwo korohereza abaturage kwirinda kubyara indahekana, SIDA, Malaria n’izindi ndwara ziterwa n’isuku nke.

Daddy SADIKI RUBANGURA
UM– USEKE.RW