Rwanda: Leta yagiriwe inama yo gusesa amasezerano na BBC no kuyijyana mu rukiko

Mu mpera z’iki cyumweru nibwo komite yari ishinzwe gukora ubucukumbuzi ku ruhare rwa Radio BBC mu kubiba amacakubiri n’ingengabitekrezo ya Jenoside, nyuma y’uko hasohotse filimi yiswe “Rwanda Untold Story” yafashwe nk’ipfobya Jenoside yakorewe Abatutsi mu 1994, yasabye ko Leta y’u Rwanda isesa amasezerano ifitanye na BBC, ikanajyana ikirego mu nkiko kandi hagakorwa igenzura ku bantu bakoze iriya filimi kugira ngo hamenyekane icyabibateye.

Mu gihe kingana n’amezi ane yose, komite igizwe n’abantu batanu, barimo Dr Christopher Kayumba inararibonye mu itangazamakuru, akaba n’umwarimu muri Kminuza, Prof Christopher Mpfizi inararibonye akaba n’umwarimu muri Kaminuza Gatolika y’i Kabgayi ndetse na Me Evode Uwizeyimana inzobere mu mategeko mpuzamahanga,  babajije abantu batandukanye bagera kuri 22.

Abo bantu 22 babajijwe bavugaga uko babona Filimi ya BBC n’ingaruka yagira ku Banyarwanda, imyanzuro yavuye muri ibyo bitekerezo by’abantu, ni byo komite ya Martin Ngoga yagendeyeho isanga filimi “Rwanda untold story” ipfobya Jenoside yakorewe Abatutsi, ibiba urwango ndetse n’amacakubiri.

Iyi komite yasabye BBC ko baganira kuri iki kibazo ariko BBC ntiyabasha kwitaba iyi komite bityo bikaba byaragaragaje ko ibyo BBC yakoze ibizi neza hatabayemo kwibeshya.

Mu gihe iyi komite yasesenguraga ubutumwa bwatanzwe muri filimi “Rwanda untold Story” ndetse inakira abatangabuhamya batandukanye, BBC nayo yakoze ubucukumbuzi bwayo ishyikiriza raporo komite y’u Rwanda. Iyi raporo ya BBC ngo yavugaga ko nta kibazo na kimwe BBC yabonye muri iyo filimi yayo yanyuze kuri Televiziyo ya BBC2 (itagaragara mu Rwanda).

Martin Ngoga yavuze ko kwanga ko baganira no kugaragaza ko nta kibazo kiri muri filimi ya BBC, ngo bivuze ko ibyo bakoze bari babizi neza ko nta mpanuka yabayeho mu kuyikora.

Abatangabuhamya barimo abashakashatsi, abanyamakuru, abakozi bo muri Leta n’abikorera ndetse n’ubushake buke bwa BBC mu kugirana ibiganiro na komite yari ishinzwe ubucukumbuzi nibyo byavuyemo imyanzuro uko ari itatu.

Umwanzuro w’uko haseswa amasezerano BBC ifitanye n’u Rwanda ngo ni uko iyi komite yasanze BBC yaratandukiriye ku masezerano ndetse ikica n’itegeko ry’u Rwanda n’amategeko mpuzamahanga. Bityo ngo amasezerano BBC ifitanye n’u Rwanda ntacyo akimaze. BBC ngo ishatse andi masezerano, yabivuga hagakorwa agira icyo afasha impande zombi. Gusesa amasezerano bivuga ko BBC itazongera kumvikanira ku mirongo ya FM mu gihugu cy’u Rwanda.

Iyi komite kandi yasabiye BBC ko yakurikiranwa mu nkiko kuko filimi “Rwanda Untold Story” igararamo ipfobya rya Jenoside, kubiba urwango ndetse n’amacakubiri.

Umwanzuro wa nyuma ni uko komite yasabye inzego bireba gukora ubucukumbuzi buhagije kugira ngo zimenye icyateye BBC gukora iyi filimi, ababigizemo uruhare n’intego bari bafite ngo kuko icyabateye kuyikora cyitabatunguye.

Mu gukusanya amakuru yatanzwe n’abatangabuhamya hari umuntu wagize uruhare mu gutanga amakuru muri fimilimi Rwanda Untold Story wasabye komite y’u Rwanda ko yavuga uko abibona maze komite iramwangira. Martin Ngoga yasobanuye ko icyari kibaraje ishinga ari gusesengura filimi bakareba ingaruka yateza aho kureba umuntu watanze amakuru aho ahagaze.

Rwanda Untold Story yasohotse tariki ya 01 Ukwakira 2014 maze Abanyarwanda benshi barayamagana mu nzego zose bavuga ipfobya Jenoside yakorewe Abatutsi mu mwaka wa 1994 kandi igashinyagurira Abanyarwanda ndetse igatesha agaciro umukuru w’igihugu Paul Kagame n’abayobozi, ibyo ni byo byavuyemo guhagarika by’agateganyo ibiganiro bya BBC Gahuza byumvikanaga mu Kinyarwanda.

Thėodomir NTEZIRIZAZA
UM– USEKE.RW