Ruhango: Rwiyemezamirimo yahaye Abaturage sheki itazigamiye

Mbonimpa  Slyvestre wahawe  isoko   ryo kubaka   ikimoteri cy’Akarere ka Ruhango,  yabeshye abaturage  ko Akarere ka Ruhango  kanze kumwishyura  bituma  atanga Sheki itazigamiye  iriho miliyoni  ebyiri zirenga z’amafaranga y’u Rwanda. 

Bamwe muri aba baturage  bahawe sheki itazigamiye bavuganye n’Umuseke,  batangaje ko rwiyemezamirimo  Mbonimpa Slyvetre  yatsindiye  isoko  ryo kubaka ikimoteri (ahashyirwa imyanda) cy’Akarere ka Ruhango,  ariko aza  kuvugana  n’aba baturage  yifuza kubaha imirimo yo  kuzana amatafari yubatse  izi nyubako  zose  nawe  akazajya  abishyura  amafaranga  ahwanye n’ imirimo  bakoze.

Mu  masezerano  aba baturage  bagiranye  n’uyu Mbonimpa,   yavugaga ko  bazajya  bishyurwa   ari uko  Akarere kishyuye  uyu rwiyemezamirimo,  kugirango nawe  yishyure  abaturage bamukorera, Akarere kamwishyuye  mu  bihe bitandukanye  kandi gakurikije  aho imirimo igeze.

Aba baturage  byaje kuba ngombwa ko  bahabwa  ibihumbi 500  mu gihe imirimo  yari  itangiye, Mbonimpa ababwira ko  andi azayabaha mu gihe  kidatinze,  ashingiye  ku masezerano bagiranye n’Akarere.

Uko iminsi yagiye  isimburana  ni nako  aba baturage  bagendaga  basaba ko rwiyemezamirimo abishyura ariko akababwira ko   nta mafaranga Akarere kari kamuha.

Rugerinyange  Onesphore  uhagarariye  abaturage bagenzi be yabwiye umunyamakuru w’Umuseke ko  baje  kugenzura  basanga  ahubwo  akarere karamwishyuye  miliyoni 100 zirenga.

Avugana n’Umuseke  mu gitondo cyo kuri uyu wa  15/07/2014 Mbonimpa  yatangaje ko  ari mu kazi  mu karere ka Huye,  bityo  ko  aza kuhagera  mu gihe cy’amanywa agasobanura  uko ikibazo kimeze.

Siko byagenze  kuko  yageze  mu Ruhango  ku gicamunsi  ariko akavuga ko  nta cyo ashobora gutangaza  kubera ko atari muri ofisi ye ko  abamushaka bose  bagomba kumusanga aho akorera mu mujyi wa Kigali.

Kambayire  Annociata  Umunyamabanga Nshingwabikorwa w’Akarere ka Ruhango yavuze  ko   Mbonimpa  Sylvestre,  Akarere  kamwishyuye  miliyoni   113 kuva imirimo yatangira, bikaba ngo bitumvikana impamvu atishyuye abaturage yakoresheje.

Uyu muyobozi avuga ko ubuyobozi bw’Akarere  bugiye  gufasha aba baturage  kugirango bishyurwe mu gihe cya vuba.

Iyi Sheki Mbonimpa yatanze itazigamiye  iriho  umukono na kashe  bya banki y’ abaturage y’u Rwanda, aba baturage  bavuze ko  basabye inguzanyo muri banki mbere yuko batangira imirimo yo kubaka, ubu  banki ikaba iri kubabarira inyungu z’ubukererwe.

Si ubwa mbere muri aka karere ba rwiyemezamirimo bishyura  abaturage  babanje  kugirana ibibazo byo kutabishyurira ku gihe ndetse rimwe na rimwe  bakabambura burundu.

Si ubwa mbere kandi ba rwiyemezamirimo bavuzwe mu kibazo kwanga kwishyura abaturage babakoreye imirimo kandi nyamara bo barishyuwe.

MUHIZI Elisee
ububiko.umusekehost.com/Ruhango