Ruhango: Abarangije Kaminuza  badafite akazi bari kwigishwa guteka

*Biteganyijwe ko nibasoza aya masomo bazahabwa Miliyoni Eshanu kuri buri muntu…

Abarangije icyiciro cya Kabiri cya Kaminuza (A0) mu mashami atandukanye batari babona akazi, bari kwiga guteka  mu ishuri ry’imyuga n’ubumenyingiro (Mpanda Vocation Training Center), bavuga ko bizeye kubona akazi kuko babona ishoramari ry’amahoteli riri gutera imbere mu Rwanda no mu karere. Biteganyijwe ko nibasoza aya masomo bazahabwa igishoro cya Miliyoni Eshanu Frw kuri buri muntu.

Bamwe mu banyeshuri barangije  ikiciro cya  kabiri cya Kaminuza (A0), mu mashami atandukanye  yo mu mashuri makuru na za Kaminuza yo mu Rwanda, bavuga ko bari bamaze igihe ari abashomeri.

Aba barangije amasomo ya kaminuza bari bamaze igihe badafite akazi, bavuga ko bigiriye inama yo gusubira ku ntebe y’ishuri mu mashuri y’imyuga n’ubumenyingiro by’umwihariko mu ishami ryigisha guteka.

Bavuga ko muri iki gihe nta muntu ukwiye gukangwa n’amashuri yize, kuko n’abarangije ikiciro cya Gatatu cya Kaminuza badapfa kubona akazi mu nzego za Leta n’iz’abikorera.

Bavuga ko bagiye kwiga amasomo yo guteka kuko babona muri iki gihe ishoramari ry’amahoteli riri gutera imbere haba mu Rwanda no mu bihugu bihana imbibi na rwo bityo ko amahirwe yo kubona akazi muri iyi mirimo ahari kurusha ibyo bigiye.

Aba baminuje muri Kaminuza bakaba bari kwiga guteka, bavuga ko kwiga umwuga ari ukwiteganyiriza kuko n’iyo batahabwa imirimo n’aya mahoteli na bo ubwabo bayihangira kuko biteganyijwe ko bazahabwa igishoro cya Miliyoni eshanu z’amafaranga y’u Rwanda kuri buri muntu.

Niyorugira Placide, afite impamyabumenyi y’icyiciro cya Kabiri (A0) mu ishuri Gatulika rya Kabgayi (ICK) mu ishami ryo kubungabunga ibidukikije, avuga ko kwiga amashuri y’imyuga mu ishami ryigisha guteka, yabitewe no kuba yari amaze igihe kinini ari umushomeri.

Avuga kandi ko yabonaga hari umubare munini w’abandi barangije ikiciro nk’icyo yarangije nabo bamaze igihe kitari gito ari abashomeri.

Uyu musore uvuga ko yahise afata icyemezo akajya kwiyandikisha muri iri shuri ryigisha guteka, Yagize ati «Uretse ubushomeri, numvaga nimbona ubushobozi nzakomeza icyiciro cya gatatu cya Kaminuza, ariko byose byarangiye mbubuze ni yo mpamvu nteganya kwihangira imirimo»

Niyigena Félicitée,  arangije  muri Kaminuza y’Ubuhinzi n’Ubworozi y’I Busogo mu ishami ryo kuhira no gukaamura ibishanga (Irrigation et Drainage) avuga ko ubushomeri abumazemo imyaka irenga itatu.

Uyu mwari nawe warangije ikiciro cya Kabiri (A0) cya Kaminuza, avuga ko nyuma y’iki gihe yamaze adafite akazi, yatakaje ikizere kuko yabonaga hanze hari abashomeri benshi.

Avuga ko yumvise itangazo rihamagarira abarangije Kaminuza kwiga amashuri y’imyuga, akavuga ko umuntu wize imyuga asanzwe ufite ubundi bumenyi bimworohera, akavuga ko inzozi ze ari ukwihangira  imirimo  kugira ngo ahe n’abandi akazi.

Ndangamira Gilbert, uyobora ishuri ry’imyuga n’ubumenyingiro rya ‘Mpanda Vocatino Training Center’ riri guhugura aba bamaze igihe mu bushomeri, avuga ko mbere  bari bafite gahunda yo kuvanga abarangije Kaminuza n’andi mashuri yisumbuye bakabigisha imyuga nk’iyi.

Uyu muyobozi uvuga ko iyi gahunda yahindutse, avuga ko Leta y’u Rwanda ifite intego yo kwihutisha ihangwa ry’imirimo  idashingiye ku buhinzi yitwa ‘National Employment Program Kora wigire”, ndetse ko ubu basabwe guhugurara abarangije Kaminuza mu kiciro cyabo.

Aba banyeshuri 38 bari kwigishwa guteka barasoje ikiciro cya kabiri cya Kaminuza, bazamara amezi ane bahabwa aya mahugurwa. Ubuyobozi bwa VTC Mpanda  buvuga ko 90% by’abanyeshuri barangije mu mashuri y’imyuga nk’iyi babonye akazi.

MUHIZI ELISEE
UM– USEKE.RW/Ruhango