Rugamba Sipriyani, Umunyampuhwe wakundaga Bikira Mariya…abahanzi bakomeye bamwigiyeho

  *Abahanzi Ngarambe Francois Xavier, Mariya Yohana na Muyango ubuhanzi bwe ngo bwabigishije byinshi.

*Umuhungu we Olivier Rugamba asanga kugira Se Umutagatifu, byakwera imbuto ku muryango nyarwanda

Kicukiro – Kuri uyu wa mbere tariki 15 Kanama 2016 hibutswe ku nshuro ya 22  umurage wa Rugamba Sipiriyani n’umuryango we, ahanini ngo mu mibereho ye umunsi w’ijyanwa mu ijuru rya Bikira Mariya (ku babyemera) yarawukundaga cyane, ngo yawuhaga agaciro cyane kuko yakundaga umubyeyi Bikiri Mariya nk’uko bihamywa na benshi bari bitabiriye uyu muhango.

Uyu muhango watangijwe n’igitambo cya Misa cyo kwibuka Rugamba Sipiriyani n’umuryango we, hanyuma hakurikiraho umuhango wo kumwibuka.

Umuhango witabiriwe n’abantu benshi barimo n’abana baba ku muhanda kuko ngo ni we washinze kimwe mu bigo bibakira,  Umuryango we La Communaute de l’Emmanuel, Itorero Amasimbi n’Amakombe na Korali Rugamba.

Mu byo abantu bagarutseho cyane muri uyu muhango, ni uko “Rugamba rw’Amahoro” nk’uko bamwitaga, yarangwaga n’urukundo, ngo yabigishije kugira urukundo n’ibikorwa by’impuhwe.

Mu kiganiro Umuseke wagiranye n’umuyobozi wa La Communaute de l’Emmanuel, Ngarambe Francois Xavier  yavuze ko Rugamba Cyprien n’umugore we ikintu cya mbere yabasigiye ari urukundo.

Yagize ati “Njye mbona ari ikinti kidasanzwe kugira indoro y’urukundo no ku bakwanga. Abakugirira nabi ukamenya kubareba mu ndoro y’urukundo, ukamenya kubavuga neza, ntubasebye. Na none kudacira imanza abandi, kuvuga abandi nabi, gushyira intege nke z’abandi hanze, ahubwo tugomba gushyira ibyiza bibaranga hanze nk’umurage Rugamba Cyprien yadusigiye.”

Umuhanzi Ngarambe Francois Xavier yakomeje avuga ko umurage yabasigiye ari ikintu umuntu wese agomba gukoresha yaba ari iwe mu rugo, ku kazi no mu gihugu. Kwitoza kureba neza ibiranga abandi, bakavuga ibyiza bagezeho aho gushyira imbere ibibi bibaranga.

Olivier Rugamba umuhungu wa Rugamba Sipiriyani yavuze ko icy’ingenzi  bifuza kugeraho ari uko ubutumwa bukubiye mu bihangano bye butazima kuko hari inyigisho nyinshi yabasigiye.

Yavuze ko nko mu ndirimbo ivuga ko “Umutima utinya no kwanga guhemuka”, irimo ubutumwa ngo n’abana bato bagomba kumenya bakazakurana bakazabuha n’abana babo.”Kwanga guhemuka”

Uyu ngo ni umurage udasaza umubyeyi we Rugamba Cyprien yasize ukwiye kwimikwa n’urubyiruko rw’u Rwanda rwa none n’uruzaza.

Olivier Rugamba avuga ko gushyira Rugamba Cyprien mu Batagatifu ba Kiliziya Gatolika (byasabwe mu myaka ishize), bo nk’umuryango babyishimira kuko ngo ni ibintu babona ko yakoreye, ariko atashatse ko yakwitwa Umutagatifu.

Kumwita Umutagatifu ngo ni ikintu cyabiba imbuto nyinshi mu muryango nyarwanda.

Umuhanzi mukuru kandi wubashywe, Mukankuranga Marie Jeanne  uzwi ku izina rya  Mariya Yohana yavuze ko nk’umuhanzi atamwigiyeho ubuhanzi gusa, ahubwo ngo yari umuntu ushyira mu bikorwa icyo yatakerezaga cyose.

Yagize ati “Hari byinshi yahimbaga, harimo indirimbo z’Imana, agahimba ku Rwanda, n’ibindi kandi bifite icyo bisobanuye kizima.”

Mariya Yohana yakomeje avuga ko  urubyiruko rugomba kugira urukundo rugashyira hamwe ndetse rugakoresha impano kugira ngo bizabagirire akamaro.

Umuhanzi Muyango Jean Marie  na we yavuze ko yumva indirimo za Rugamba Cyprien yumvise ko atari umuririmbyi  gusa ahubwo ngo yari umusizi kuko wumvise amagambo ari mu ndirimbo ze ngo ntaho bihuriye n’ibyo baririmba.

Ati “Amagambo ye yose ntabwo wapfa kuyisobanurira mu byo yaririmbaga, ahubwo n’ibintu wagombaga kubanza ugasobanuza, mu by’ukuri yari Umusizi  kandi nta wundi muntu yumvanye amagambo akoresha, uretse wenyine (Rugamba).”

Mu buhamya bwagiye butangwa, benshi bagiye bavuga ko Rugamba Cyprien n’umugore we Mukansanga Daphrose babeshejweho n’impuhwe z’Imana, kandi bazisangizaga abandi, bafasha abakene.

Bavuze ko hari n’abandi Umuryango wa Rugamba wafashaga kubona ibyo kurya, gusa ngo ibyo byose yabikoraga mu ibanga.

Ibikorwa by’impuhwe Rugamba Cyprien na Daphrose bakoraga ngo ni byinshi cyane, kandi impuhwe bagiraga  ngo bazivomaga mu isengesho.

Bombi bishwe muri Jenoside yakorewe Abatutsi mu 1994.

Photos/ D S Rubangura/UM– USEKE

Daddy SADIKI RUBANGURA
UM– USEKE.RW