Remera: Arakekwaho kwica mugenzi we bapfa umukobwa

Mu ijoro ryacyeye ahagana  saa 8:30 z’ijoro, mu Murenge wa Remera mu Karere ka Gasabo, ahazwi nko ku cya Mitsingi, muri Rukiri II, Ruturusu I, umusore  witwa Bizimana Joseph  arakekwaho kwica mugenzi we witwaga Gikongoro amuziza ko yaterese umukobwa babanaga witwa Uwingabire Ariette.

Amakuru Umuseke ukesha inzego z’umutekano muri aka gace, avuga ko Gikongoro yaje muri iyo restora avuga ko aje kureba ‘umugore we’ nyuma akaza gusangwa yapfiriye muri iyo Resitora ikorera aho ngaho ariko idafite icyapa kiyiranga.

Nshimiyimana Felicien ukuriye umutekano muri Ruturusu I, yabwiye Umuseke ko aba bakekwaho kwica uyu musore batari basinze kandi ko uwapfuye atakubiswe umuhini ahubwo ko yavaga amaraso mu mazuru no mu kanwa bityo ngo inzego zibishinzwe zizerekana icyo yicishijwe kuko iperereza rigikomeza.

Uyu musore Gikongoro bivugwa ko yari afite hagati y’imyaka 20 na 30 yakoraga akazi gatandukanye mu byo bita gupagasa.

Umukobwa aba basore bapfuye ngo yararanaga na Bizimana nk’umugore n’umugabo muri iyi Restora  kandi ngo yaje kuhakora akurikiye Bizimana, nk’uko abashinzwe umutekano babitangaza.

Abakekwaho ubu bwicanyi bari mu maboko ya Polisi muri bo harimo nyiri restora witwa Uwingabire Clementine, Bizimana Joseph ndetse n’undi musore amazina ye na n’ubu ataramenyekana.

BIRORI Eric

ububiko.umusekehost.com