RDC: Imirwano ya FDLR n’AbaMayi Mayi yahitanye 7

Imirwano yahuze umutwe wa FDLR n’Aba-Mayi Mayi bo mu mutwe urengera inzirakarengane “Union des Patriotes pour la Défense des Innocents (UPDI)” kuwa gatandatu tariki 14 Ugushyingo yahitanye abantu Barindwi (7), barimo abarwanyi ba FDLR 5.

Iyi mirwano yabereye muri Kivu ya Ruguru, mu gace kitwa Lubero, mu Burasirazuba bwa Repubulika Iharanira Demokarasi ya Congo (DRC).

Umuryango uharanira amahoro, Demokarasi n’uburenganzira bwa muntu ‘CEPADHO’ ukorera muri Kivu ya Ruguru uvuga ko iyi mirwano ikaze yamaze amasaha hafi abiri yabereye ahitwa Kimaka.

CEPADHO ikavuga ko iyi mirwano yatangijwe n’abarwanyi ba UPDI bateye ku birindiro bya FDLR biri Kimaka, ngo babasha kwirukana umutwe wa FDLR muri ibyo birindiro, ndetse banayirukana muri ako gace kose.

Iyi raporo ya CEPADHO ikavuga ko muri iyi mirwano haguyemo abarwanyi batanu ba FDLR, ndetse abandi benshi barakomereka. Ku ruhande rw’Aba-Mayi Mayi ariko nabo ngo bapfushije abarwanyi babiri. Iyi mirwano ariko ngo yanatumye abaturage batari bacye bo muri Kimaka bahunga ibyabo.

UM– USEKE.RW