Rayon Sports idafite Moussa Camara yanganyije na Pépinière FC 2-2
Mu mukino wa gicuti, Pépinière FC yo ku Ruyenzi yanganyije na Rayon Sports ibitego 2-2. Muri uyu mukino, Rayon yakinnye idafite Moussa Camara na Yves Rwigema iherutse gusinyisha.
Kuri uyu wa gatandatu tariki 24 Nzeri 2016, mu Murenge wa Runda wo mu Karere ka Kamonyi, habereye umukino wa gicuti wo kwishyura warangiye Rayon Sports inganyije ibitego 2-2 na Pépinière FC itozwa na Kayiranga Jean Baptiste.
Mu gice cya mbere Rayon Sports yagaragazaga amakosa muri ba myugariro, bigafasha Pépinière FC gusatira kenshi. Ku munota wa 27, Manzi Thierry yasiganiye umupira na Mutuyimana Evariste warindiraga Rayon Sports, byatumye Mike Djuko, Pépinière FC yavanye muri Muhanga abambura umupira agatsinda igitego cya mbere.
Ku munota wa 35, Rayon Sports yishyuye, igitego cyatsinzwe na rutahizamu mushya Lomami Frank, ku mupira yahawe na Nahimana Shasir.
Gusa ibyishimo by’abakunzi ba Rayon Sports bari benshi kuri iki kibuga ntibyatinze, kuko ku munota wa 40, Mugisha Francois bita Master yateze Ishimwe Kevin wa Pépinière FC mu rubuga rw’amahina. Ishimwe Kevin wakiniye Rayon Sports arayiterera arayinjiza, igice cya mbere kirangira ari 2-1.
Mu gice cya kabiri, umutoza Masudi yakoze impinduka nyinshi ashaka igitego cyo kwishyura. Savio Nshuti Dominique, Nova Bayama na Nsengiyumva Moustafa bafashe umwanya wa Muhire Kevin, Irambona Eric na Manishimwe Djabel.
Bakomeje gusatira ariko iminota 90 irangira babuze igitego. Mu minota y’inyongera, ku munota wa 92, kuri ‘corner’ yatewe na Savio Nshuti, myugariro wa Pépinière FC Waswa Hassan yaje kwitsinda igitego, umukino urangira utyo.
Uyu mukino wakiniwe ku kibuga cy’ibitaka, ntiwagaragayemo rutahizamu Moussa Camara ufite ikibazo cy’imvune mu itako, Ishimwe Issa Zapi urwaye Maralia, na Rwigema Yves Rayon Sports yakuye muri APR FC, kuko ngo nta myitozo ihagije afite.
Mu mukino ubanza wa gicuti wahurije aya makipe yombi ku Mumena, i Nyamirambo, Rayon Sports yatsinze Pépinière FC ibitego 4-1.
Roben NGABO
UM– USEKE.RW
1 Comment
None se niba Yves afite imyitozo mike azaykora ryari?
Comments are closed.